लग्नाचा पहिला वाढदिवस साजरा करण्यासाठी भारतातील जादुई ठिकाणे; जिथे जूनच्या उन्हाळ्यातही बर्फ पाहायला मिळतो

India Tourism : तुमच्या लग्नाचा पहिला वाढदिवस आहे का? आणि तो तुम्हाला एखाद्या सुंदर अशा बर्फाच्छदित ठिकाणी साजरा करायचा असेल तर भारतात अशी अनेक ठिकाणे आहे जिथे जूनच्या उन्हाळ्यातही बर्फ पाहायला मिळतो. यामध्ये रोहतांग पास, लडाख, गुलमर्ग, युमथांग व्हॅली आणि औली यांसारख्या ठिकाणांचा समावेश आहे. बर्फवृष्टीचा अनुभव घेण्यासाठी, साहसी उपक्रमांचा आनंद घेण्यासाठी आणि उन्हाळ्यातही थंडगार दऱ्यांचा आनंद घेण्यासाठी तुम्ही येथे नक्कीच भेट देऊ शकतात.

या ठिकाणांचे मुख्य आकर्षण केवळ बर्फच नाही, तर नैसर्गिक सौंदर्य, साहसी उपक्रम आणि शांतता हे देखील आहे. काही ठिकाणी उंच पर्वतांमध्ये बर्फाची पांढरी चादर पसरलेली दिसते, तर इतर ठिकाणी हिमनद्या आणि गोठलेली सरोवरे थक्क करून सोडतात. एकदा तुम्ही तिथे भेट दिल्यावर, तुम्हाला पुन्हा पुन्हा परतावेसे वाटेल.

रोहतांग पास

हिमाचल प्रदेशातील रोहतांग पास हे उन्हाळ्यात बर्फ पाहण्यासाठी सर्वात लोकप्रिय ठिकाणांपैकी एक आहे. मनालीपासून सुमारे ५० किलोमीटर अंतरावर असलेला हा पास मे आणि जूनमध्येही बर्फाने झाकलेला असतो. येथे पर्यटक स्नो स्कूटरिंग, स्कीइंग आणि बर्फात खेळण्याचा आनंद घेतात. वाटेतील पर्वत आणि धबधबे हा प्रवास आणखी अविस्मरणीय बनवतात.

लडाख

लडाखचे सौंदर्य जादुईपेक्षा कमी नाही. येथे अनेक उंच खिंडी आणि पर्वतीय प्रदेश आहे जिथे जूनमध्येही बर्फ पाहायला मिळतो. विशेषतः खारदुंग ला आणि चांग ला यांसारख्या खिंडी पांढऱ्या शुभ्र बर्फाच्या जाड थराने पर्यटकांना मोहित करतात. ज्यांना बाईक ट्रिप आवडतात, त्यांच्यासाठी हे ठिकाण एक स्वप्नपूर्ती आहे.

गुलमर्ग

जर तुम्हाला मिनी स्वित्झर्लंडचा अनुभव घ्यायचा असेल, तर गुलमर्गला जा. काश्मीरमधील गुलमर्ग त्याच्या सौंदर्यासाठी आणि बर्फाच्छादित प्रदेशासाठी जगभरात प्रसिद्ध आहे. मे आणि जून महिन्यातही येथील उंच शिखरांवर बर्फ दिसतो. गुलमर्ग गोंडोला राईडमधून दिसणारे बर्फाच्छादित पर्वतांचे दृश्य नेत्रदीपक असते. येथील हवामान उन्हाळ्यातही थंड आणि आल्हाददायक असते.

युमथांग व्हॅली

जर तुम्हाला फुले आणि बर्फाच्या स्वर्गाचा आनंद घ्यायचा असेल, तर सिक्कीमला जा. सिक्कीममधील युमथांग व्हॅली 'फुलांची दरी' म्हणूनही ओळखली जाते. येथील अनेक भागांमध्ये मे आणि जून महिन्यातही बर्फ दिसतो. बर्फाच्छादित पर्वत, रंगीबेरंगी फुले आणि थंडगार वारा या ठिकाणाला खास बनवतात. निसर्गप्रेमी आणि छायाचित्रणाच्या शौकिनांसाठी हे ठिकाण स्वर्गापेक्षा कमी नाही.

औली

औलीमध्ये तुम्ही उन्हाळ्यातही थंडीचा अनुभव घेऊ शकता. उत्तराखंडमधील औली स्कीइंगसाठी प्रसिद्ध आहे, परंतु उन्हाळ्यातही येथील थंड दऱ्या आणि सभोवतालचा बर्फ पर्यटकांना आकर्षित करतो. इथून नंदा देवी पर्वताचे दृश्य भव्य आहे. केबल कारचा प्रवास आणि हिरव्यागार वनराईच्या पार्श्वभूमीवर दिसणारी बर्फाच्छादित शिखरे हा एक खरोखरच खास अनुभव आहे.