मॉडेल आणि अभिनेत्री पूनम पांडेचा पती सॅम बॉम्बे याला मुंबई पोलिसांनी अटक केली आहे. पूनमने पतीवर मारहाणीचा आरोप केला होता, त्यानंतर पोलिसांनी सोमवारी संध्याकाळी सॅमला अटक केली. पोलिसांनी सांगितले की, तक्रार नोंदवल्यानंतर पूनमला रुग्णालयात दाखल करण्यात आले. याप्रकरणी पुढील तपास सुरू आहे.
मुंबई पोलिसांनी सांगितले की, 'सॅम बॉम्बेवर भारतीय दंड संहितेच्या (आयपीसी) कलमांतर्गत तक्रार नोंद करण्यात आली आहे. अभिनेत्रीच्या डोक्यावर, डोळ्यावर आणि चेहऱ्यावर गंभीर जखमा झाल्या आहेत. पूनम आणि सॅममधील वादाबद्दल फारशी माहिती नाही. सध्या पोलीस या प्रकरणाचा तपास करत आहेत.
पूनम पांडेने सॅम बॉम्बेवर मारहाणीचा आरोप करण्याची ही पहिलीच वेळ नाही. पूनम आणि सॅमचे सप्टेंबर 2020 मध्ये लग्न झाले. लग्नानंतर काही दिवसांनी पूनमने सॅमवर शारीरिक छळ, धमक्या आणि मारहाणीचे आरोप केले. तिने गोव्यात तक्रार दाखल केली होती आणि सॅमने कथितपणे तिच्यावर हल्ला केला आणि धमकी दिल्याचे म्हटले होते. रिपोर्टनुसार, पूनम त्यावेळी गोव्यात शूटिंग करत होती. तक्रारीनंतर पोलिसांनी त्याला अटक केली पण दुसऱ्याच दिवशी त्याला जामीन मिळाल्याची माहिती आहे. त्यावेळी पूनम म्हणाली होती की, मला हे लग्न संपवायचे आहे.
विशेष म्हणजे, 10 सप्टेंबर 2020 रोजी पूनम आणि सॅमचे लग्न झाले. दोघांनी सोशल मीडियावर फोटो शेअर करून चाहत्यांना या लग्नाची माहिती दिली होती. लग्नापूर्वी सॅम आणि पूनम बराच काळ लिव्ह-इन रिलेशनशिपमध्ये होते.
