CJP आंदोलनाला सेलिब्रिटींचा पाठिंबा! अतुल कुलकर्णींनी मागितली तरुणाईची माफी

देशात सातत्याने होणारे पेपर लीकचे प्रकार आणि शैक्षणिक व्यवस्थेतील गोंधळाच्या विरोधात 'कॉकरोच जनता पार्टी' (CJP) या सोशल मीडियावरील एका आगळ्यावेगळ्या मोहिमेने आता आंदोलनाचे रूप घेतले आहे. ६ जून रोजी दिल्लीतील जंतर-मंतरवर या आंदोलनाचे आयोजन करण्यात आले असून, यात केंद्रीय शिक्षण मंत्र्यांच्या राजीनाम्याची मागणी केली जाणार आहे. या आंदोलनाला आता बॉलिवूड आणि मराठी चित्रपटसृष्टीतील नामांकित कलाकारांनी जाहीर पाठिंबा दिला आहे. प्रसिद्ध अभिनेते अतुल कुलकर्णी आणि अभिनेत्री कुनिका सदानंद यांनी देशातील तरुणांना या आंदोलनात सहभागी होऊन प्रश्न विचारण्याचे आवाहन केले आहे.

अतुल कुलकर्णी यांची तरुणांची माफी

प्रसिद्ध अभिनेते अतुल कुलकर्णी यांनी या आंदोलनाला पूर्ण पाठिंबा देत, त्यांच्या सोशल मीडिया अकाऊंटवरून देशातील तरुण पिढीची जाहीर माफी मागितली आहे. त्यांनी लिहिले की:

"प्रिय तरुण नागरिकांनो, तुम्ही तुमची आवाज बुलंद करण्यासाठी आणि स्वतःच्या हक्कांचे निर्णय घेण्यासाठी तयार आहात आणि मी या प्रवासात तुमच्यासोबत आहे. माझ्या पिढीने आणि आमच्या आधीच्या व नंतरच्या पिढ्यांनी आपली जबाबदारी योग्य प्रकारे पार पाडली नाही. आम्ही चुका केल्या आणि तुमच्यासाठी आव्हानांचा डोंगर मागे सोडला, ज्याचा सामना आता तुम्हाला करावा लागत आहे. याबद्दल मी तुमची मनापासून माफी मागतो. तुम्ही पूर्ण प्रामाणिकपणे आणि संवेदनशीलतेने या देशाची पुनर्बांधणी करावी, हीच अपेक्षा."

जेव्हा आवाज ऐकला जात नाही, तेव्हा असे मार्ग निवडावे लागतात

अभिनेत्री कुनिका सदानंद यांनीही एक व्हिडिओ शेअर करत या आंदोलनाचे कौतुक केले आहे. त्या म्हणाल्या की, "जेव्हा सर्वसामान्य जनतेचा किंवा विद्यार्थ्यांचा आवाज व्यवस्थेकडून ऐकला जात नाही, तेव्हा सिस्टीममधील 'अंध्या आणि बहिऱ्या' लोकांपर्यंत आपला आवाज पोहोचवण्यासाठी अशा अनोख्या मार्गांचा अवलंब करावा लागतो. कॉकरोच जनता पार्टीने अशा मुद्द्यांना वाचा फोडली आहे, ज्याकडे दुर्लक्ष केले जात होते. विद्यार्थी ज्या हिंमतीने बाहेर पडून याला पाठिंबा देत आहेत, त्याचा मला अभिमान वाटतो."

लोकशाहीबद्दल बोलताना त्या पुढे म्हणाल्या की, एक मजबूत लोकशाही ही कोणत्याही एका पक्षाची, नेत्याची, विचारसरणीची किंवा धर्माची नसते. ती अशा जागरूक नागरिकांमुळे मजबूत होते जे स्वतःचा स्वतंत्र विचार करतात, न भीता प्रश्न विचारतात आणि अंधभक्त बनण्याऐवजी तथ्यांचा शोध घेतात.

pic.twitter.com/6L4qUacuB0

— atul kulkarni (@atul_kulkarni) June 5, 2026

प्रकाश राज आणि सोनम वांगचुक यांचाही पाठिंबा

'कॉकरोच जनता पार्टी'चे (CJP) संस्थापक अभिजित दीपके यांनी या शांततापूर्ण आंदोलनाची हाक दिली आहे. या आंदोलनाला केवळ अतुल कुलकर्णी आणि कुनिका सदानंद यांचेच नाही, तर प्रसिद्ध अभिनेते प्रकाश राज आणि प्रख्यात पर्यावरणवादी व सामाजिक कार्यकर्ते सोनम वांगचुक यांनीही पाठिंबा दिला आहे. सोनम वांगचुक यांनी तर शिक्षण मंत्र्यांनी राजीनामा न दिल्यास स्वतः आंदोलनात सामील होण्याचा इशारा दिला होता.

६ जून रोजी होणाऱ्या या आंदोलनाच्या पार्श्वभूमीवर दिल्लीतील जंतर-मंतर परिसरात पोलिसांनी कडक बंदोबस्त तैनात केला असून बॅरिकेड्स लावण्यात आले आहेत. नागरिकांना शांततापूर्ण मार्गाने आंदोलन करण्याचे आवाहन करण्यात आले आहे.