"क्लीन अप कंपनी"चा ट्रेलर प्रदर्शित; तीन मित्र मृतदेह विल्हेवाट लावणारी कंपनी सुरू करतात

प्राईम व्हिडिओने त्यांच्या आगामी एमएक्स ओरिजिनल सिरीज, "क्लीन अप कंपनी"चा ट्रेलर प्रदर्शित केला आहे. जिओ स्टुडिओजची निर्मिती आणि जी-कॉम्सची निर्मिती असलेल्या या सिरीजचे दिग्दर्शन आणि लेखन रोहन घोष यांनी केले असून, कोनारक मुखर्जी यांनी सह-लेखन केले आहे.

या सिरीजमध्ये अमेय वाघ, विशाल जेठवा, अजितेश गुप्ता, जिस्सू सेनगुप्ता, सस्वत चॅटर्जी आणि रवी किशन यांच्या प्रमुख भूमिका आहेत. राजू, स्वप्न आणि गोल्डी या तीन मित्रांना एका गुंडासाठी मृतदेहांची विल्हेवाट लावण्याचे काम दिले जाते. एक अनपेक्षित संधी म्हणून सुरू झालेली ही गोष्ट हळूहळू त्यांना गुन्हेगारीच्या अशा जगात ओढत नेते, ज्याची त्यांनी कधी कल्पनाही केली नव्हती.

ज्योती देशपांडे, कार्तिक निशंदर आणि अर्जुन सिंग बरन निर्मित 'क्लीन अप कंपनी' ही मालिका २१ ऑगस्ट २०२६ पासून प्राईम व्हिडिओ आणि नव्याने लाँच झालेल्या प्राईम व्हिडिओच्या एमएक्स प्लेयर अँड्रॉइड ॲपवर विनामूल्य स्ट्रीम होईल.

सारिबगंज या कायदाहीन सीमावर्ती शहरात घडणारी ही मालिका, अशा शहराची झलक दाखवते जिथे टोळीयुद्ध आणि राजकीय प्रभाव लोकांच्या जीवनावर नियंत्रण ठेवतात. ट्रेलर प्रेक्षकांना या तीन मित्रांच्या जगात अधिक खोलवर घेऊन जातो.

एका खुनानंतर मृतदेहाची विल्हेवाट लावण्यासाठी अब्बास त्यांना कामावर ठेवतो, तेव्हा कथेला सुरुवात होते. राजू, स्वप्न आणि गोल्डी या परिस्थितीचे एका अनोख्या व्यवसायाच्या संधीत रूपांतर करतात आणि स्वतःची क्लीन-अप कंपनी सुरू करतात. पण जसजसा त्यांचा व्यवसाय वाढतो, तसतसे ते सारिबगंजच्या शक्तिशाली गुंडांचे लक्ष्य बनतात.

दरम्यान, एक धाडसी आयपीएस अधिकारी देखील शहरातील गुन्हेगारी नेटवर्कचा शोध घेण्याचा प्रयत्न करत आहे. संधी आणि धोका यांमधील फरक हळूहळू अस्पष्ट होत जातो, तसतसे हे तिघे खून, विश्वासघात आणि बदलत्या नात्यांच्या जाळ्यात अडकतात. सारिबगंज सोडून नवीन आयुष्य सुरू करण्याचे त्यांचे स्वप्न त्यांच्यापासून अधिकच दूर जाऊ लागते.

प्राइम व्हिडिओ इंडियाचे संचालक आणि एव्हीओडी (AVOD) कंटेंटचे प्रमुख, अमोघ दुसाद, या मालिकेबद्दल म्हणाले, "प्राइम व्हिडिओमध्ये, आम्ही नेहमी अशा कथांच्या शोधात असतो, ज्या प्रेक्षकांना सुरुवातीपासूनच खिळवून ठेवतात आणि त्यांच्या मनात काहीतरी अनपेक्षित विचार रुजवतात. 'क्लीन अप कंपनी' ही अशीच एक कथा आहे. ही कथा तीन मित्रांची आहे, जे अचानक गुन्हेगारी घटनास्थळे साफ करण्याचे काम करू लागतात."

ते पुढे म्हणाले, "ही कथा सारिबगंजच्या जगात डोकावते, जिथे टोळीयुद्ध, राजकारण आणि जगण्यासाठीचा संघर्ष समांतरपणे चालतो. क्राईम थ्रिलर, मैत्री आणि डार्क ह्युमर यांचे मिश्रण ही या मालिकेची खासियत आहे, ज्याला एका उत्कृष्ट कलाकारांच्या चमूने अधिकच प्रभावी बनवले आहे." 'क्लीन अप कंपनी' प्रेक्षकांपर्यंत पोहोचवण्यासाठी आम्ही उत्सुक आहोत आणि आशा आहे की आमच्या सेवेवर त्यांना ही अनोखी कथा आवडेल.

'क्लीन अप कंपनी' ही क्राईम, कॉमेडी आणि मैत्री यांचे एक मजेदार मिश्रण असेल. कथेमध्ये, एका चुकीच्या निर्णयामुळे दुसरा चुकीचा निर्णय घेतला जातो आणि परिस्थितीत अडकण्यापेक्षा त्यातून बाहेर पडणे अधिक कठीण होते. ही ८ भागांची मालिका २१ ऑगस्ट २०२६ पासून केवळ प्राईम व्हिडिओ आणि एमएक्स प्लेयर अँड्रॉइड ॲपवर विनामूल्य स्ट्रीम होईल.

Edited By- Dhanashri Naik