संत निवृत्तिनाथांचे अभंग 1 ते 10

अवीट अमोला घेता पैं निमोला । तो प्रत्यक्ष देखिला भीमातटीं ॥ १ ॥

अव्यक्त साकार अकारिला अंकूर । क्षरला चराचर भक्तिकाजें ॥ २ ॥

अनुमान विटे सर्वाघटींमाजिटें । तें परब्रह्म ईटें भक्तिसाह्य ॥ ३ ॥

निवृत्ति घनवट पिकलिसे पेठ । पुंडलिकें प्रगट केलें असे ॥ ४ ॥

*****

प्राणिया उद्धार सर्व हा श्रीधर । ब्रह्म हें साचार कृष्णमूर्तीं ॥१ ॥

तें रूप भीवरें पांडुरंग खरें । पुंडलिकनिर्धारें उभे असें ॥ २ ॥

युगे अठ्ठावीस उभा ह्रषीकेश । पुंडलिका सौरस पुरवित ॥ ३ ॥

निवृत्तीचें गुज पांडुरंगाबीज । विश्वजनकाज पुरे कोडें ॥ ४ ॥

*****

रूपाचें रूपस विठ्ठलनामवेष । पंढरीनिवास आत्माराम ॥ १ ॥

पुंडलिकभाग्य वोळलें संपूर्ण । दिननिशीं कीर्तन विठ्ठल हरी ॥ २ ॥

त्रैलोक्य उद्धरे ऐसी पव्हे त्वरे । कीर्तन निर्धारे तरुणोपाव ॥ ३ ॥

पूण्य केलें चोख तारिले अशेख । जनीं वनीं एकरूप वसे ॥ ४ ॥

वेदादिकमति ज्या रूपा गुंतती । तो आणूनी श्रीपति उभा केला ॥ ५ ॥

निवृत्तीचा सखा विठ्ठलरूप देखा । निरालंब शिखा गगनोदरीं ॥ ६ ॥

*****

पाहतां साधन विठ्ठलकीर्तन । भक्तसंजीवन आत्माराम ॥ १ ॥

विठ्ठल सधर भिवरा तें नीर । नाम निरंतर केशवाचें ॥ २ ॥

शिवसुरवर चिंतिती सुस्वर । कीर्तनविचार पंढरीसी ॥ ३ ॥

निवृत्ति कीर्तन दिननिशीं ध्यान । मनाचें उन्मन इये रूपीं ॥ ४ ॥

*****

मन कामना हरि मनें बोहरी । चिंतितां श्रीहरि सुखानंद ॥ १ ॥

तें पुंडलिक तपें वोळलें स्वरूप । जनाचीं पै पापें निर्दाळिली ॥ २ ॥

वेणुनाद तीर्थ चंद्रभागा समर्थ । विठ्ठल दैवत रहिवास ॥ ३ ॥

निवृत्ति साकर विठ्ठल आचार । भिवरा तें नीर अमृतमय ॥ ४ ॥

*****

निराकार वस्तु आकारासि आली । विश्रांति पैं जाली विश्वजना ॥ १ ॥

भिवरासंगमीं निरंतर सम । तल्लीन ब्रह्म उभें असे ॥ २ ॥

पुंडलिक ध्याये पुढत पुढती सोये । विठ्ठल हेंचि गाये संकीर्तनीं ॥ ३ ॥

निवृत्तिसंकीर्तन ब्रह्म हें सोज्वळ । नाम हें रसाळ अनिर्वाच्य ॥ ४ ॥

*****

पुंडलीकपेठ वैष्णवाचा हाट । करिती बोभाट हरिनामाचा ॥ १ ॥

वाळलें अंबर अमृततुषार । झेलीत अमर चकोर झाले ॥ २ ॥

देव मुनी सर्व ब्रह्मादिक लाठे । पंढरीये पेठे प्रेमपिसे ॥ ३ ॥

निवृत्ति निर्वाळिला ज्ञानदेव सोपान । खेचर तल्लीन वीनटला ॥ ४ ॥

*****

विठ्ठल श्रीहरि उभा भीमातीरीं । तिष्ठती कामारी मुक्तिचारी ॥ १ ॥

मुनिजनां सुख निरंतर लक्ष । भक्तां निजसुख देत असे ॥ २ ॥

पुंडलिकपुण्य मेदिनीकारुण्य । उद्धरिले जन अनंत कोटी ॥ ३ ॥

निरानिरंतर भीमरथी तीर । ब्रह्म हें साकार इटे नीट ॥ ४ ॥

नित्यता भजन जनीं जनार्दन । ब्रह्मादिक खुण पावताती ॥ ५ ॥

निवृत्ति तत्पर हरीरूप सर्व । नाम घेतां तृप्त आत्माराम ॥ ६ ॥

*****

भवजळ काया पंचतत्त्वमाया । भजन उभया पंढरीरावो ॥ १ ॥

तारक पंढरी प्रत्यक्ष भीमातीरीं । ब्रीदें चराचरीं बोले वेदु ॥ २ ॥

माया मोहजाळ ममता निखळ । सेवितां सकळ होय हरी ॥ ३ ॥

निवृत्तीचें फळ सकळ हा गोपाळ । तोडी मायाजाळ संकीर्तने ॥ ४ ॥

*****

नित्य हरिकथा नित्य नामावळी । वैष्णवांचे कुळीं धन्य जन्म ॥ १ ॥

म्हणोनि पंढरी उपजवावें संसारीं । प्रत्यक्ष श्रीहरी तीरीं उभा ॥ २ ॥

नित्यता दिवाळी नाहीं तेथें द्वैत । नित्यता अच्युत तिष्ठतसे ॥ ३ ॥

निवृत्ति सादर विष्णुमय सार । विठ्ठल आचार पंढरिये ॥ ४ ॥

*****