श्री दत्त अपराध क्षमापन स्तोत्रम् : मनःशांती, क्षमा आणि श्री दत्त कृपा मिळवण्यासाठी दररोज पठण करा

॥ श्री दत्त अपराध क्षमापण स्तोत्रम् ॥

दत्तात्रेयं त्वां नमामि प्रसीद

त्वं सर्वात्मा सर्वकर्ता न वेद ।

कोऽप्यन्तं ते सर्वदेवाधिदेव

ज्ञाताज्ञातान्मेऽपराधान् क्षमस्व ॥ १ ॥

त्वदुद्भवत्वात्त्वदधीनधीत्वा-

-त्त्वमेव मे वन्द्य उपास्य आत्मन् ।

अथापि मौढ्यात् स्मरणं न ते मे

कृतं क्षमस्व प्रियकृन्महात्मन् ॥ २ ॥

भोगापवर्गप्रदमार्तबन्धुं

कारुण्यसिन्धुं परिहाय बन्धुम् ।

हिताय चान्यं परिमार्गयन्ति

हा मादृशो नष्टदृशो विमूढाः ॥ ३ ॥

न मत्समो यद्यपि पापकर्ता

न त्वत्समोऽथापि हि पापहर्ता ।

न मत्समोऽन्यो दयनीय आर्य

न त्वत्समः क्वापि दयालुवर्यः ॥ ४ ॥

अनाथनाथोऽसि सुदीनबन्धो

श्रीशाऽनुकम्पामृतपूर्णसिन्धो ।

त्वत्पादभक्तिं तव दासदास्यं

त्वदीयमन्त्रार्थदृढैकनिष्ठाम् ॥ ५ ॥

॥ वरप्रार्थना ॥

गुरुस्मृतिं निर्मलबुद्धिमाधि-

-व्याधिक्षयं मे विजयं च देहि ।

इष्टार्थसिद्धिं वरलोकवश्यं

धनान्नवृद्धिं वरगोसमृद्धिम् ॥ ६ ॥

पुत्रादिलब्धिं म उदारतां च

देहीश मे चास्त्वभय हि सर्वतः ।

ब्रह्माग्निभूम्यो नम ओषधीभ्यो

वाचे नमो वाक्पतये च विष्णवे ॥ ७ ॥

॥ शांति पाठ ॥

शान्ताऽस्तु भूर्नः शिवमन्तरिक्षं

द्यौश्चाऽभयं नोऽस्तु दिशः शिवाश्च ।

आपश्च विद्युत्परिपान्तु देवाः

शं सर्वतो मेऽभयमस्तु शान्तिः ॥ ८ ॥

॥ इति श्रीमद्वासुदेवानन्दसरस्वती विरचितं श्री दत्तापराध क्षमापण स्तोत्रम् सम्पूर्णम् 
Edited By - Priya Dixit