बांगलादेशची राजधानी ढाका येथील एका विशेष न्यायालयाने मंगळवारी देशाच्या माजी पंतप्रधान शेख हसीना, त्यांचा मुलगा सजीब वाजेद आणि इतर 16 जणांविरुद्ध नवीन अटक वॉरंट जारी केले. निवासी भूखंड वाटपात कथित अनियमिततेबाबत दाखल झालेल्या दोन प्रकरणांमध्ये ही कारवाई करण्यात आली आहे.
भ्रष्टाचार विरोधी आयोगाच्या (एसीसी) आरोपपत्राचा विचार केल्यानंतर ढाका महानगर वरिष्ठ विशेष न्यायाधीश न्यायालयाने हे अटक वॉरंट जारी केले. शेख हसीना आणि त्यांच्या जवळच्या लोकांनी राजधानी ढाक्याच्या बाहेरील पूर्वाचल न्यू टाउनमध्ये भूखंड खरेदी करताना नियमांचे उल्लंघन केल्याचा आरोप आहे. या प्रकरणातील एका सरकारी वकिलाने सांगितले की, बहुतेक आरोपी हे सरकारी अधिकारी आहेत.
न्यायाधीश झाकीर हुसेन यांनी देशभरातील अनेक पोलिस ठाण्यांना 29 एप्रिलपर्यंत अटकेचा प्रगती अहवाल सादर करण्याचे निर्देश दिले. सध्या सर्व आरोपींना फरार घोषित करण्यात आले आहे. यापूर्वी, याच न्यायालयाने हसीनाची मुलगी सायमा वाजेद पुतुल, बहीण शेख रेहाना, ब्रिटिश खासदार ट्यूलिप सिद्दीक, रेहानाचा मुलगा रदवान मुजीब सिद्दीक आणि इतर 48 जणांविरुद्ध अशाच प्रकारच्या आरोपांवर अटक वॉरंट जारी केले होते
शेख हसीना आणि त्यांची बहीण रेहाना यांच्यावर मुजीब शताब्दी समारंभावर 4000कोटी रुपये खर्च केल्याबद्दलही खटला दाखल करण्यात आला आहे. रेहाना कोणतेही अधिकृत पदावर नसतानाही हे पैसे राष्ट्रीय तिजोरीतून खर्च करण्यात आले. आंतरराष्ट्रीय गुन्हे न्यायाधिकरणाने शेख हसीना आणि त्यांच्या सहकाऱ्यांविरुद्ध मानवतेविरुद्ध गुन्हे आणि जबरदस्तीने बेपत्ता करणे यासारख्या गंभीर आरोपांवर अटक वॉरंट जारी केले आहे.
