मुंबई इंडियन्सने IPL 2023 मध्ये सलग दुसरा विजय नोंदवला आहे. वानखेडे स्टेडियमवर एक विशेष उपक्रम म्हणून, संघ त्यांच्या महिला संघाची जर्सी परिधान करून बाहेर आला आणि कोलकाताविरुद्ध पाच गडी राखून विजय नोंदवला. व्यंकटेश अय्यरच्या शतकाच्या जोरावर कोलकाता नाईट रायडर्सने 20 षटकांत 6 गडी गमावून 185 धावा केल्या होत्या. प्रत्युत्तरात मुंबईने 17.4 षटकांत 5 बाद 186 धावा करून सामना जिंकला. मुंबईकडून इशान किशनने 58 धावा केल्या.
मुंबईचा नियमित कर्णधार रोहित शर्माला पोटाचा त्रास होता. अशा परिस्थितीत सूर्याने संघाची कमान हाती घेतली आणि नाणेफेक जिंकून प्रथम गोलंदाजी करण्याचा निर्णय घेतला. आयपीएलमधला पहिला सामना खेळताना अर्जुन तेंडुलकरने गोलंदाजीला सुरुवात केली, पण तो फार काही करू शकला नाही. त्याने दोन षटकात 17 धावा दिल्या. यानंतर त्याला गोलंदाजी करण्याची संधी मिळाली नाही. कोलकाताची सुरुवात काही खास नव्हती. नारायण जगदीसन खाते न उघडता कॅमेरून ग्रीनचा बळी ठरला.
कोलकात्याची पहिली विकेट 11 धावांवर पडली आणि व्यंकटेश फलंदाजीला आला. त्याने क्रीजवर येताच मोठे फटके खेळायला सुरुवात केली. तथापि, वेंकटेश अय्यर ग्रीनकडून चेंडू स्कूप करण्याच्या प्रयत्नात अयशस्वी ठरला आणि त्याच्या गुडघ्याला दुखापत झाली. यानंतर फिजिओ मैदानावर आला आणि त्याला वेदनाशामक औषधे दिली आणि त्यानंतर व्यंकटेशने चौकार आणि षटकार मारले.
या सामन्यात रिंकू सिंगही काही विशेष करू शकला नाही आणि 18चेंडूत 18 धावा करून बाद झाला. शेवटी आंद्रे रसेलने 11 चेंडूत 21 धावा करत संघाची धावसंख्या 185 धावांपर्यंत पोहोचवली. मुंबईकडून हृतिक शोकीनने दोन बळी घेतले. अर्जुन वगळता मुंबईच्या इतर सर्व गोलंदाजांना प्रत्येकी एक विकेट मिळाली.
कोलकातासाठी केवळ सुयश शर्माच प्रभाव पाडू शकला. त्याने 27 धावांत दोन गडी बाद केले. शार्दुल, चक्रवर्ती आणि फर्ग्युसन यांनाही प्रत्येकी एक विकेट मिळाली, मात्र हे तिन्ही गोलंदाज दबाव निर्माण करण्यात अपयशी ठरले. सलग दुसऱ्या विजयासह मुंबईचा संघ गुणतालिकेत आणखी चांगल्या स्थानावर पोहोचला आहे.
