'फॅब फोर' फलंदाज केन विल्यमसनने आंतरराष्ट्रीय क्रिकेटला निरोप दिला

'फॅब फोर' कसोटी फलंदाजांपैकी एक असलेल्या केन विल्यमसनने आंतरराष्ट्रीय क्रिकेटमधून निवृत्ती घेतली आहे. तो सध्या किवी कसोटी संघासोबत इंग्लंड दौऱ्यावर आहे. पहिल्या कसोटीत तो चांगली कामगिरी करू शकला नाही, ज्यामुळे न्यूझीलंडला मोठा पराभव पत्करावा लागला. तात्काळ प्रभावाने घेतलेल्या या निर्णयामुळे तो दुसऱ्या कसोटीत सहभागी होणार नाही. विराट कोहलीप्रमाणेच केन विल्यमसनही १०,००० कसोटी धावा पूर्ण करण्याच्या उंबरठ्यावर होता, पण त्याआधीच त्याने आपली बॅट कायमची खाली ठेवली.

न्यूझीलंड क्रिकेटने प्रसिद्ध केलेल्या निवेदनात विल्यमसन म्हणाला, "मी यावर खूप विचार केला आहे आणि गेल्या काही दिवसांपासून मला वाटत होते की हीच योग्य वेळ आहे. आंतरराष्ट्रीय क्रिकेट खेळण्याची माझी नेहमीच तीव्र इच्छा आणि आवड होती आणि न्यूझीलंडसाठी प्रत्येक सामन्यात माझे सर्वस्व दिल्याचा मला अभिमान आहे."

तसेच न्यूझीलंड क्रिकेटने म्हटले आहे, "आमचा एक महान खेळाडू निवृत्त होत आहे." केन विल्यमसनने तात्काळ प्रभावाने आंतरराष्ट्रीय क्रिकेटमधून निवृत्त होण्याचा निर्णय घेतला आहे. केन विल्यमसनने कर्णधार म्हणून न्यूझीलंडला वर्ल्ड टेस्ट चॅम्पियनशिपच्या अंतिम सामन्यापर्यंत नेले आणि या शतकातील दुसरे आयसीसी विजेतेपद पटकावले.

आपल्या कारकिर्दीत विल्यमसनने ९,५१५ कसोटी धावा, ७,५२६ एकदिवसीय धावा आणि २,५७२ टी-२० आंतरराष्ट्रीय धावा केल्या आहे. २०१६ ते २०२४ या सुवर्णकाळात त्याने न्यूझीलंडचे तिन्ही फॉरमॅटमध्ये नेतृत्व केले. त्याच्या कर्णधारपदाखाली संघाने दोन आयसीसी विश्वचषक अंतिम सामने आणि तीन उपांत्य सामने खेळले आणि २०२१ मध्ये आपले पहिले आयसीसी वर्ल्ड टेस्ट चॅम्पियनशिप विजेतेपद पटकावले. विल्यमसनने २०१० मध्ये आंतरराष्ट्रीय क्रिकेटमध्ये पदार्पण केले आणि गेल्या नोव्हेंबरमध्ये टी-२० क्रिकेटमधून निवृत्ती घेतली. त्याने न्यूझीलंडसाठी ३७८ सामन्यांमध्ये विक्रमी १९,३४६ धावा केल्या, ज्यात ४८ शतके आणि सहा द्विशतकांचा समावेश आहे. निवृत्तीनंतर विल्यमसन इंग्लंडविरुद्ध सुरू असलेल्या कसोटी मालिकेतील उर्वरित सामन्यांमध्ये सहभागी होणार नाही.

Edited By- Dhanashri Naik