USA vs ENG : T20 विश्वचषक स्पर्धेत इंग्लंडचा दुसऱ्यांदा विजय

वेगवान गोलंदाज ख्रिस जॉर्डनच्या चमकदार कामगिरीनंतर कर्णधार जोस बटलर आणि फिल सॉल्ट या सलामीच्या जोडीने उत्कृष्ट कामगिरी केल्याने इंग्लंडने अमेरिकेचा 10 गडी राखून पराभव केला. या विजयासह गतविजेता इंग्लंड सध्या सुरू असलेल्या टी-20 विश्वचषकाच्या उपांत्य फेरीत पोहोचणारा पहिला संघ ठरला आहे. या स्पर्धेत इंग्लंडने एकही विकेट न गमावता विजय मिळवण्याची ही दुसरी वेळ आहे.

ख्रिस जॉर्डनच्या हॅट्ट्रिकच्या जोरावर इंग्लंडने सुपर एट टप्प्यातील सामन्यात अमेरिकेचा डाव 18.5 षटकांत 115 धावांत आटोपला. प्रत्युत्तरात इंग्लंडने 9.4 षटकांत बिनबाद 117 धावा करत सामना जिंकला. इंग्लंडकडून बटलरने 38 चेंडूंत सहा चौकार आणि सात षटकारांच्या मदतीने नाबाद 83 धावा केल्या तर फिल सॉल्टने 21 चेंडूंत दोन चौकारांच्या मदतीने 25 धावा केल्या. ग्रुप स्टेजमध्ये चमकदार कामगिरी करणाऱ्या यूएस संघाची सुपर एटमध्ये निराशाजनक कामगिरी झाली आणि या संघाने तिन्ही सामने गमावले आणि ते स्पर्धेतून बाहेर पडले. या दणदणीत विजयासह, इंग्लंड संघ सुपर एट टप्प्यातील गट दोनमध्ये दोन विजय आणि एक पराभवासह तीन सामन्यांतून चार गुणांसह अव्वल स्थानावर पोहोचला आहे.

Edited by - Priya Dixit