बेकिंग सोडा आणि इनोशिवायही मऊ इडल्या बनवता येतात; खरी जादू ही पीठ भिजवण्याच्या पद्धतीत आणि प्रमाणात असते

हॉटेलसारख्या मऊ आणि लुसलुशीत इडल्या बनवण्यासाठी सोडा किंवा इनोची अजिबात गरज नसते. खरी जादू ही पीठ भिजवण्याच्या पद्धतीत आणि प्रमाणात असते. विना सोडा मऊ इडली बनवण्यासाठी खालील काही खास टिप्स फॉलो करा.

तांदूळ आणि डाळीचे योग्य प्रमाण
इडली मऊ होण्यासाठी डाळीचे प्रमाण महत्त्वाचे असते. साधारणपणे ३ वाट्या तांदूळ असतील तर १ वाटी उडीद डाळ हे प्रमाण योग्य ठरते. शक्य असल्यास 'इडली राइस' किंवा जुना जाडा तांदूळ वापरावा.

मेथी दाण्यांचा वापर
डाळ आणि तांदूळ भिजत घालताना त्यात १ छोटा चमचा मेथी दाणे टाका. मेथीमुळे पीठ आंबवण्याची प्रक्रिया चांगली होते आणि इडल्यांना छान जाळी पडते.

'पोहे' हा गुपित घटक
डाळ-तांदूळ वाटताना त्यात अर्धी वाटी भिजवलेले पोहे घालून वाटा. पोह्यांमुळे इडली अतिशय मऊ आणि पांढरीशुभ्र होते. जर पोहे नसतील, तर तुम्ही शिजवलेला पांढरा भातही वापरू शकता.

वाटण्याची पद्धत
उडीद डाळ एकदम बारीक आणि लोण्यासारखी मऊ वाटून घ्यावी.
तांदूळ मात्र किंचित रवाळ ठेवावेत.
डाळ आणि तांदूळ वेगवेगळे वाटून नंतर एकत्र करावेत आणि हाताने ५ मिनिटे नीट फेटावे. हाताच्या उबदेपणामुळे पीठ छान फुगायला मदत होते.

पीठ आंबवणे
पीठ खूप घट्ट किंवा खूप पातळ असू नये.
मिश्रण किमान ८ ते १० तास उबदार ठिकाणी झाकून ठेवा.
पीठ छान फुगून वर आले की समजायचे की इडल्या मऊ होणारच!

इडली वाफवतानाची काळजी
इडली पात्रातील पाणी आधी चांगले उकळू द्या, मगच इडली स्टँड आत ठेवा.
नेहमी मध्यम ते उच्च आचेवर १०-१२ मिनिटे इडल्या वाफवाव्यात. खूप वेळ वाफवल्यास इडल्या चामट किंवा कडक होऊ शकतात.

हिवाळ्यात पीठ लवकर फुगत नसेल, तर पीठ ठेवलेल्या भांड्याला गरम कपड्याने गुंडाळून ठेवा किंवा बंद ओव्हनमध्ये ठेवा. यामुळे पीठ नैसर्गिकरीत्या छान आंबते आणि सोड्याची गरज भासत नाही.
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीची पूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.

Edited By- Dhanashri Naik<>