Festival Posters

Select Your Language

Notifications

webdunia
webdunia
webdunia
webdunia

Perimenopause vs Menopause पेरीमेनोपॉज आणि मेनोपॉजमध्ये काय फरक असतो?

४० शी ओलांडलेल्या प्रत्येक महिलेने हे जाणून घ्याच!

Perimenopause vs Menopause
वय ४० ओलांडल्यानंतर अनेक महिलांच्या शरीरात अचानक बदल जाणवू लागतात. कधी मासिक पाळी वेळेआधी येते तर कधी कित्येक दिवस येतच नाही; अचानक खूप उष्णता वाटणे, रात्री खूप घाम येणे, चिडचिड होणे, झोप न येणे आणि पोट आणि कंबरेभोवती वजन वाढणे अशा समस्या उद्भवतात. बऱ्याचदा महिला याला केवळ वाढत्या वयाचा प्रभाव, थकवा किंवा मानसिक ताण समजून दुर्लक्ष करतात. परंतु, हे पेरीमेनोपॉज (Perimenopause) चे संकेत असू शकतात. अनेकदा 'पेरीमेनोपॉज' आणि 'मेनोपॉज' हे दोन्ही शब्द एकाच अर्थाने वापरले जातात, पण वैद्यकीयदृष्ट्या या दोन्ही टप्प्यांमध्ये खूप मोठा फरक आहे.
 
१. पेरीमेनोपॉज आणि मेनोपॉजमधील मुख्य फरक
पेरीमेनोपॉज (Perimenopause): हा मेनोपॉजच्या आधीचा काळ असतो. हा टप्पा मेनोपॉज येण्याच्या साधारण ५ ते ८ वर्षे आधी सुरू होऊ शकतो (सामान्यतः वयाच्या ४० ते ४५ दरम्यान). या काळात शरीरातील संप्रेरकांचे प्रमाण सतत कमी-जास्त होत असते.
 
मेनोपॉज (Menopause): जेव्हा एखाद्या महिलेची मासिक पाळी सलग १२ महिने (१ वर्ष) पूर्णपणे बंद असते, तेव्हा त्या स्थितीला मेनोपॉज म्हणतात. या टप्प्यावर स्त्रीची नैसर्गिक प्रजनन क्षमता पूर्ण होते.
 
२. पेरीमेनोपॉजची मुख्य लक्षणे आणि त्यामागील कारणे
पेरीमेनोपॉजच्या काळात शरीरात प्रामुख्याने तीन संप्रेरकांमध्ये बदल घडतात, ज्यामुळे खालील लक्षणे दिसतात:
१. एस्ट्रोजन कमी होणे: यामुळे अचानक अंगातून उष्णतेच्या लाटा येणे, रात्री घाम येणे, मूड स्विंग्स आणि हाडे कमकुवत होणे यांसारखे त्रास होतात.
२. प्रोजेस्टेरॉन कमी होणे: या संप्रेरकाच्या कमतरतेमुळे चिडचिड, अति-तणाव, अस्वस्थता आणि झोप न येण्याची समस्या निर्माण होते.
३. इन्सुलिन रेजिस्टन्स वाढणे: या काळात शरीरातील इन्सुलिनची कार्यक्षमता कमी होते, ज्यामुळे वारंवार भूक लागते आणि पोटाभोवतीची चरबी वाढून वजन वेगाने वाढते.
 
३. पेरीमेनोपॉजच्या काळात स्वतःला निरोगी ठेवण्यासाठी सोपे उपाय
हा काळ शारीरिक व मानसिकदृष्ट्या आव्हानात्मक असू शकतो, पण दैनंदिन जीवनशैलीत काही सोपे बदल करून हा त्रास नक्कीच कमी करता येतो:
संतुलित आहार घ्या: आहारात हिरव्या पालेभाज्या, ताजी फळे, धान्य, डाळी, प्रोटीन आणि कॅल्शियमयुक्त पदार्थांचा समावेश करा. प्रक्रिया केलेले अन्न आणि साखरेचे प्रमाण कमी करा.
शारीरिक हालचाल ठेवा: रोज किमान ३० मिनिटे वेगाने चालणे, योग, स्ट्रेचिंग किंवा हलका व्यायाम करा.
झोपेची वेळ निश्चित करा: दररोज एकाच वेळी झोपण्याची आणि उठण्याची सवय लावा. झोपण्यापूर्वी मोबाईल किंवा लॅपटॉप वापरणे टाळा.
 
नैसर्गिक/घरगुती मदत:
भाजलेली अळशी : दररोज १ चमचा भाजलेली अळशीची पूड पाणी किंवा दह्यासोबत घेतल्यास त्यातील 'फायटोएस्ट्रोजन'मुळे हॉट्स फ्लॅशचा त्रास कमी होण्यास मदत होते.
दालचिनी पाणी: सकाळी रिकाम्या पोटी कोमट पाण्यात एक चिमूट दालचिनी पावडर पिण्याने इन्सुलिनची पातळी संतुलित राहते आणि वजन नियंत्रणात राहण्यास मदत होते.
तणाव व्यवस्थापन: ध्यान, प्राणायाम किंवा आवडत्या छंदात मन रमवून तणाव कमी करा.
 
वारंवार विचारले जाणारे प्रश्न (FAQs)
प्र. पेरीमेनोपॉजदरम्यान गरोदर राहणे शक्य आहे का?
होय. जोपर्यंत मासिक पाळी पूर्णपणे (सलग १२ महिने) बंद होत नाही, तोपर्यंत बीजांडनिर्मिती होत राहू शकते, त्यामुळे या काळात गर्भधारणेची शक्यता असते.
 
प्र. पेरीमेनोपॉज सुरू होण्याचे योग्य वय कोणते?
सामान्यतः वयाच्या ४० ते ४५ दरम्यान हा काळ सुरू होतो.

प्र. मासिक पाळी थांबणे म्हणजेच रजोनिवृत्ती (मेनोपॉज) होय का?
उत्तर: होय, सलग १२ महिने मासिक पाळी न येण्याच्या स्थितीला रजोनिवृत्ती असे म्हणतात.
 
टीप: पेरीमेनोपॉज हा प्रत्येक स्त्रीच्या आयुष्यातील एक नैसर्गिक टप्पा आहे. जर लक्षणे खूप जास्त गंभीर असतील किंवा त्रास सहन होत नसेल, तर डॉक्टरांचा सल्ला घेणे योग्य ठरते.

Share this Story:

Follow Webdunia marathi

पुढील लेख

घरात भाज्या नसतील तेव्हा बनवा १० मिनिटांत झटपट राजस्थानी दही-पापडची भाजी