मुंबईत बेस्ट बस डिव्हायडरला धडकल्याने वृद्ध व्यक्तीचा मृत्यू, बस चालक आणि वाहक जखमी

मुंबईच्या मानखुर्द परिसरात सोमवारी सकाळी एक भीषण रस्ते अपघात घडला. सायन-पनवेल महामार्गावर एका रुग्णालयासमोर बेस्ट (बृहन्मुंबई विद्युत पुरवठा आणि परिवहन) बसवरील नियंत्रण सुटले आणि ती रस्त्याच्या कडेला असलेल्या डिव्हायडरला धडकली. अपघाताच्या वेळी डिव्हायडरजवळ उभे असलेले ६५ वर्षीय भास्कर रावसाहेब पांडे यांना बसची धडक बसली आणि ते गंभीर जखमी झाले. त्यांना तातडीने राजावाडी रुग्णालयात दाखल करण्यात आले, जिथे डॉक्टरांनी त्यांना मृत घोषित केले. 

मिळालेल्या माहितीनुसार या अपघातात इतर दोन जणही जखमी झाले असून त्यांच्यावर उपचार सुरू आहे. पोलीस आणि संबंधित अधिकारी घटनास्थळी दाखल झाले असून त्यांनी तपास सुरू केला आहे. बस चालकाचे नियंत्रण कसे सुटले हे अद्याप स्पष्ट झालेले नाही. या अपघातामुळे महामार्गावरील वाहतूकही काही काळ विस्कळीत झाली होती.

Edited By- Dhanashri Naik