मुंबई विमानतळ किंवा रेल्वे स्टेशनसाठीची टॅक्सी रद्द केल्यास पाचपट दंड आकारला जाणार; रक्कम थेट प्रवाशाच्या खात्यात जमा होणार

मुंबईत, विमानतळ, रेल्वे स्टेशन किंवा रुग्णालय यांसारख्या ठिकाणी जाण्यासाठी टॅक्सी बुक केल्यानंतर चालकाने ती रद्द केल्यास, त्याला आता भाड्याच्या पाचपट दंड आकारला जाईल. माहितीनुसार महाराष्ट्र सरकारने लागू केलेल्या 'महाराष्ट्र मोटार वाहन एग्रीगेटर नियम, २०२६' नुसार, हा दंड सरकारी खात्यात न जमा करता, थेट पीडित प्रवाशाच्या ॲप वॉलेटमध्ये जमा केला जाईल.

मुंबईतील विमानतळ, रेल्वे स्टेशन आणि रुग्णालय यांसारख्या महत्त्वाच्या ठिकाणी जाण्यासाठी बुक केलेली टॅक्सी रद्द करणाऱ्या चालकांवर आता कठोर कारवाई केली जाईल. महाराष्ट्र सरकारने अशा प्रकरणांमध्ये सामान्य दंडाच्या पाचपट दंड आकारण्याची तरतूद केली आहे. हा दंड थेट प्रवाशाच्या ॲप खात्यात जमा केला जाईल. ऐनवेळी टॅक्सी रद्द केल्यामुळे प्रवाशांना होणारा त्रास टाळणे, हा सरकारचा उद्देश आहे.

महाराष्ट्र सरकारने लागू केलेल्या 'महाराष्ट्र मोटार वाहन एग्रीगेटर नियम, २०२६' अंतर्गत ओला, उबर आणि रॅपिडो सारख्या ॲप-आधारित टॅक्सी सेवांसाठी अनेक नवीन नियम लागू करण्यात आले आहे. या नियमांनुसार, जर चालकाने स्वीकारलेली राईड रद्द केली, तर त्याला एकूण भाड्याच्या १० टक्के किंवा कमाल १०० रुपये दंड आकारला जाईल. तथापि, विमानतळ, रेल्वे स्टेशन किंवा रुग्णालय यांसारख्या अत्यावश्यक कामांसाठी राईड रद्द केल्यास, दंड सामान्यपेक्षा पाचपट जास्त असेल.

नवीन नियमांनुसार, प्रवासादरम्यान तांत्रिक बिघाड झाल्यास कंपनीने पर्यायी वाहन उपलब्ध करून देणे आवश्यक आहे, ज्यामुळे प्रवाशांची सोय देखील होईल. 

Edited By- Dhanashri Naik