Mumbai Heavy Rain Alert : मुंबईत आज सकाळपासून सुरू असलेल्या मुसळधार पावसामुळे पश्चिम द्रुतगती मार्गावर मोठी कोंडी झाली आहे. येत्या दोन ते तीन तासांत मुंबईत मुसळधार पावसाचा इशारा हवामान खात्याने दिला आहे. मुंबई, ठाणे, रायगड आणि पालघरमध्ये मुसळधार पाऊस पडेल, असा इशारा हवामान खात्याने दिला आहे.
देशाच्या विविध भागात मुसळधार पाऊस सुरू आहे. मुसळधार पावसाची शक्यता लक्षात घेऊन हवामान खात्याने महाराष्ट्रातील सात जिल्ह्यांमध्ये 'रेड अलर्ट' जारी केला आहे. येत्या 24 तासांत पालघर, रत्नागिरी, रायगड, नाशिक, पुणे, कोल्हापूर आणि गडचिरोली येथे मुसळधार ते अतिवृष्टीचा इशारा देण्यात आला आहे. गेल्या 24 तासांत पुरामुळे सात जणांचा मृत्यू झाला आहे.
हवामान खात्याने इशारा दिला आहे
मुसळधार पावसाची शक्यता लक्षात घेऊन भारतीय हवामान संस्थेने 14 जुलैपर्यंत महाराष्ट्रात 'रेड अलर्ट' जारी केला आहे. मुंबईत पुढील 3 दिवसांसाठी ऑरेंज अलर्ट जारी करण्यात आला आहे.
राज्य आपत्ती व्यवस्थापन प्राधिकरणाने सांगितले की 1 ते 10 जूनपर्यंत पुरामुळे मृतांची संख्या 83 वर पोहोचली आहे. राज्यात एनडीआरएफच्या 13 टीम आणि राज्य आपत्ती नियंत्रणाच्या दोन टीम वेगवेगळ्या भागात कार्यरत आहेत.
मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी गडचिरोलीतील पूरग्रस्त भागाला भेट दिली. दौऱ्यानंतर प्रसारमाध्यमांशी बोलताना मुख्यमंत्री म्हणाले की, दरवर्षी पुरामुळे गडचिरोली जिल्ह्यातील गावे व इतर भागांचा संपर्क तुटतो. या समस्येला तोंड देण्यासाठी कायमस्वरूपी योजनेवर काम करण्याबाबत त्यांनी सांगितले.
पुण्यात 2 ठिकाणी भूस्खलन तर गडचिरोलीत 3 जण बेपत्ता
सरकारी अधिकाऱ्यांनी दिलेल्या माहितीनुसार, अतिवृष्टीमुळे पुण्यातील खेड तालुक्यातील भीमाशंकर मंदिराजवळ एकापाठोपाठ दोन दरड कोसळल्या. पहिली भूस्खलन सकाळी झाली तर दुसरी घटना दुपारी घडली. या घटनेत कोणतीही जीवितहानी झाल्याचे वृत्त नाही.
