पाकिस्तानच्या आणखी एका 'हनी ट्रॅप'चा पर्दाफाश झाला आहे. पाकिस्तानने ललनेचा वापर करून भारतीय हवाई दलातील एका अधिकाऱ्याला गद्दारी करण्यास भाग पाडले असून या अधिकाऱ्यानेही केवळ फोनवर सेक्स चॅट करण्यासाठी भारताची गुपितं पाकिस्तानला फोडल्याची धक्कादायक माहिती समोर आली आहे.
अरुण मारवाह असं या अधिकाऱ्याचं नाव असून तो भारतीय हवाई दलाचा ग्रुप कॅप्टन आहे. पाकिस्तानच्या आयएसआय या गुप्तचर संस्थेला भारतीय हवाई दलाची गुप्त माहिती दिल्याच्या आरोपाखाली त्याला अटक करण्यात आली आहे. मारवाह हा हवाई दलाच्या मुख्यालयातील महत्वाच्या कागदपत्रांचे फोटो मोबाइलवर काढून व्हॉट्सअॅपवरुन आयएसआयला पाठवायचा, अशी माहिती स्पेशल सेलचे डीसीपी प्रमोद कुशवाहा यांनी दिली.
गेल्या काही दिवसांपासून मारवाहच्या हालचाली संशयास्पद वाटल्यानंतर त्याला ३१ जानेवारी रोजी चौकशीसाठी ताब्यात घेण्यात आले होते. त्याच्या अटकेनंतर 'हनी ट्रॅप'चा पर्दाफाश झाला. आयएसआयने फेसबुकवरून मारवाहला हनी ट्रॅपच्या जाळयात ओढले होते. आयएसआयची एजंट किरण रंधवा हिने मॉडेल असल्याचे भासवून त्याला भुरळ घातली. चॅटवरून आठवडाभर अश्लिल गप्पा मारल्यानंतर तो आयएएफच्या युद्ध सरावाची माहिती द्यायला तयार झाला. या प्रकरणात आर्थिक देवाणघेवाण झाल्याची माहिती उघड झालेली नाही. फक्त सेक्स चॅटच्या मोहापायी तो ही गुप्त माहिती आयएसआयला देत होता. युद्धाशी संबंधित लढाऊ विमानांच्या सरावाच्या माहितीची कागदपत्रे त्याने आयएसआयला पुरवली. त्याच्यामुळे 'गगन शक्ती' या इंडियन एअरफोर्सच्या सरावाची माहिती पाकिस्तानला मिळाली असल्याचं तपासातून उघड झालं आहे.
