भूकंपग्रस्त म्यानमारला मदत करण्यासाठी भारत सतत पुढाकार घेत आहे. आता ऑपरेशन ब्रह्मा अंतर्गत म्यानमारमध्ये मानवतावादी सहाय्य आणि आपत्ती निवारण (HADR) पथक तैनात करण्यात आले आहे. शनिवारी म्यानमारमधील नायपिदाव विमानतळावर लष्कराच्या 50 पॅरा ब्रिगेडच्या कमांडरचा समावेश असलेल्या पथकाचे म्यानमारमधील भारतीय राजदूत, म्यानमार संरक्षण प्रमुख आणि नौदल प्रमुख यांनी स्वागत केले.पॅरा ब्रिगेड टीमच्या नेतृत्वाखाली, फील्ड हॉस्पिटलची 118 सदस्यांची टीम लोकांना आरोग्य सेवा पुरवेल.
रविवारी सकाळी पथकाने ऑपरेशन सुरू केले. मंडालेमध्ये एक अधिकारी आणि एक कनिष्ठ अधिकारी यांच्या नेतृत्वाखाली एक पथक तैनात करण्यात आले. मंडालेमध्ये आरोग्य सेवा सुधारण्यावर भर दिला जात आहे. येथील रस्त्यावर ऑपरेशन थिएटर उभारण्याची तयारी सुरू आहे.
तत्पूर्वी, दोन C-17 विमाने म्यानमारमध्ये पोहोचली आणि त्यात 118 सदस्यांचे भारतीय लष्कराचे फील्ड हॉस्पिटल युनिट होते, ज्यामध्ये महिला आणि बालसंगोपन सेवांचाही समावेश होता. तसेच, 60 टन मदत साहित्य पाठवण्यात आले आहे. भारतातून एकूण पाच मदत विमाने म्यानमारला पोहोचली.
ऑपरेशन ब्रह्मा अंतर्गत, एक C-130 विमान नेयपिडॉ येथे उतरले ज्यामध्ये 38 एनडीआरएफ कर्मचारी आणि 10 टन मदत साहित्य होते. आपत्तीत जखमी झालेल्यांवर उपचार करण्यासाठी 60 खाटांचे वैद्यकीय उपचार केंद्र उभारले जाईल, असे लष्कराने सांगितले.
