लखनौ (IANS) | एका 30 वर्षीय व्यक्तीने फेसबुक लाईव्ह केले आणि नंतर गोमती नदीत उडी मारली. पोलिसांनी सांगितले की, एसडीआरएफचे जवान तैनात करण्यात आले आहेत, परंतु शेवटचा अहवाल येईपर्यंत त्या व्यक्तीचा शोध लागला नव्हता. राहुल असे या तरुणाचे नाव आहे. पोलिसांनी दिलेल्या माहितीनुसार, राहुल एका फेसबुक लाइव्हवर दिसला आणि म्हणाला की काही लोक त्याचा छळ करत असल्याने त्याने हे कठोर पाऊल उचलले आहे. पोलिसांनी त्याच्या घरातून सुसाईड नोट जप्त केली आहे.
गोमतीनगर पोलीस ठाण्याचे प्रभारी डी.सी. मिश्रा म्हणाले की, पोलिसांनी पाच जणांविरुद्ध गुन्हा दाखल केला आहे, त्यापैकी टोनी आणि सुजित वर्मा अशी दोघांची नावे आहेत. मिश्रा म्हणाले, नदीत उडी मारण्यापूर्वी राहुलने काही लोक त्रास देत असल्याचा आरोप केला. राहुलचे फेसबुक लाईव्ह पाहून त्याच्या कुटुंबीयांना धक्काच बसला. नातेवाईकांनी सांगितले की, राहुल पत्नीसोबत बाहेरगावी गेला होता. नंतर त्याने तिला घरी सोडले आणि लवकरच परत येईल असे सांगून निघून गेला. दरम्यान, राहुलचा शोध पुन्हा सुरू करण्यात आला आहे.
Edited by : Smita Joshi