अंमलबजावणी संचालनालयाने (ईडी) पश्चिम बंगालमधील इंदुभूषण हलदरला अटक करून बेकायदेशीर पासपोर्ट रॅकेटचा पर्दाफाश केला आहे. हलदर उर्फ दुलालवर पाकिस्तानी एजंटच्या मदतीने बेकायदेशीर बांगलादेशी नागरिकांना सुमारे 250पासपोर्ट पुरवल्याचा आरोप आहे. ईडीने शनिवारी एका निवेदनात म्हटले आहे की, केंद्रीय तपास यंत्रणेने ताब्यात घेतल्यानंतर आणि चौकशी केल्यानंतर हलदरला 13 ऑक्टोबर रोजी कोलकाता येथे अटक करण्यात आली.
एजन्सीने सांगितले की, हलदर हा भारत-बांगलादेश सीमेवरील नादिया जिल्ह्यातील चकदाह गावचा रहिवासी आहे. या प्रकरणातील मुख्य आरोपी आझाद हुसेन, उर्फ आझाद मलिक, किंवा अहमद हुसेन आझाद नावाचा एक पाकिस्तानी एजंट आहे. हुसेनला एप्रिलमध्ये ईडीने अटक केली होती आणि सध्या तो तुरुंगात आहे. जूनमध्ये आझाद हुसेनविरुद्ध आरोपपत्र दाखल करण्यात आले होते.
निवेदनात म्हटले आहे की, आझाद हुसेन हा आझाद मलिक या खोट्या ओळखीखाली भारतात राहत होता. पैशाच्या बदल्यात बांगलादेशातून घुसखोरांना भारतीय ओळखपत्रे पुरवण्यात तो सहभागी असल्याचे आढळून आले.
केंद्रीय एजन्सीच्या म्हणण्यानुसार, हुसेनने भारतीय पासपोर्ट शोधणाऱ्या बांगलादेशींना हलदरकडे पाठवले. एजन्सीने म्हटले आहे की, हलदर उर्फ दुलालने बांगलादेशींना भारतीय पासपोर्ट मिळवून देण्यात महत्त्वाची भूमिका बजावली.हलदरवर अंदाजे 250 प्रकरणांमध्ये अशी बनावट कागदपत्रे पुरवल्याचा आरोप आहे. कोलकाता आणि कलकत्ता उच्च न्यायालयाने त्यांचे अटकपूर्व जामीन अर्ज फेटाळले.
