Uttar Pradesh Public Service Commission changed decision : विद्यार्थ्यांच्या सततच्या आंदोलनापुढे गुरुवारी उत्तर प्रदेश लोकसेवा आयोगाने (UPPSC) नमते घेतले. आयोगाने आपला निर्णय बदलत आता परीक्षा एकाच दिवशी आणि एकाच शिफ्टमध्ये घेण्यात येणार असल्याचे सांगितले आहे. दरम्यान, RO आणि ARO 2023 च्या परीक्षाही पुढे ढकलण्यात आल्या आहेत.
यापूर्वी आयोगाने दोन दिवस आणि दोन शिफ्टमध्ये परीक्षा घेण्याचा निर्णय घेतला होता. या निर्णयाविरोधात विद्यार्थी आयोगाच्या प्रयागराज कार्यालयासमोर तीन दिवस ठाम होते. चौथ्या दिवशी आयोगाने त्यांच्या मागणीपुढे नमते घेत आपला निर्णय बदलला. आयोगाने पीसीएस प्री आणि आरओ-एआरओ परीक्षा 2 दिवस आणि 2 शिफ्टमध्ये घेण्याचे सांगितले होते. यामुळे विद्यार्थी संतप्त झाले.
आयोगाच्या अध्यक्षांविरोधात घोषणाबाजी : गुरुवारी सकाळी आंदोलक उमेदवारांनी पुन्हा एकवटून आयोगाचे अध्यक्ष संजय श्रीनेट यांच्याविरोधात घोषणाबाजी केली. बुधवारी सायंकाळी या उमेदवारांनी कँडल मार्च काढून निषेध केला होता. जोपर्यंत आमच्या मागण्या पूर्ण होत नाहीत तोपर्यंत हे आंदोलन एक आठवडा असो वा अनेक आठवडे आम्ही आंदोलन सुरूच ठेवणार असल्याचे आंदोलक उमेदवार ज्ञानेंद्र कुमार यांनी सांगितले होते. आयोगाच्या आडमुठेपणाच्या विरोधात आम्ही कँडल मार्च काढत आहोत.
आयोगाने काय म्हटले: मंगळवारी, उत्तर प्रदेश लोकसेवा आयोगाने एक निवेदन जारी केले होते की, वेळोवेळी, उमेदवारांच्या विनंतीनुसार, बदलत्या काळाच्या गरजा लक्षात घेऊन प्रणाली/परीक्षा प्रणाली सुधारित करण्यात आली आहे. आयोगाने म्हटले आहे की, उमेदवारांच्या सोयीच्या दृष्टीने पीसीएसच्या मुख्य परीक्षेतून ऐच्छिक विषय काढून टाकण्याचा अभूतपूर्व निर्णय घेण्यात आला आहे. तसेच स्केलिंग काढण्याची उमेदवारांची मागणी पूर्ण करण्यात आली.
