फुरसुंगी, पुणे येथे महिन्यापूर्वी नैराश्य, आजारपण याला कंटाळून एका कुटुंबातील तिघांनी विष प्राशन करून आत्महत्येचा प्रयत्न केला होता. यात ७० वर्षांच्या वडिलांचा मृत्यू झाला तर मुलगा व आई अत्यवस्थ होते . त्यांच्यावर उपचार करण्यात आल्यानंतर ते बरे झाल्यावर पुन्हा त्यांनी विष प्राशन करून आत्महत्या केली . त्यात आई व मुलाचा मृत्यू झाला. दुर्गंधी सुटल्याने हा प्रकार उघडकीस आला. ही घटना फुरसुंगीत लक्ष्मी निवास येथे सोमवारी उघडकीस आली.
२२ मे रोजी सूर्यप्रकाश हरिश्चंद्र अबनावे (वय ७०, रा. लक्ष्मी निवास, फुरसुंगी, हडपसर) यांनी आत्महत्या केली होती. तर शनिवारी पत्नी जनाबाई सूर्यप्रकाश अबनावे ( वय ६५) आणि मुलगा चेतन सूर्यप्रकाश अबनावे (वय ४५) यांनी औषध पिऊन आत्महत्या केली . आज सकाळी शेजारच्यांनी त्यांचा दरवाजा वाजवला .मात्र प्रतिसाद न मिळाल्याने पोलिसांना कळवले .पोलिसांनी दरवाजा उघडल्यावर आत्महत्या केल्याचे उघडकीस आले .
अबनावे कुटुंब गेल्या १० ते १२ वर्षांपासून येथे राहत आहेत. सूर्यप्रकाश हे एका फोटोग्राफरकडे कामाला होते. ते निवृत्त झाले होते , उत्पन्नाचे काही साधन नव्हते . त्यांच्या पत्नीला कॅन्सर झाला. तो अंतिम टप्प्यात होता . मुलगा चेतन याची नोकरी गेली होती . त्याचे दोन घटस्फोट झाले आहेत. हे संपूर्ण कुटुंब आर्थिक व आजारपणामुळे नैराश्याच्या गर्तेत अडकल्याने असा टोकाचा निर्णय घेतला.
