अहिल्यादेवी होळकर कर्जमुक्ती योजना: पुण्यातील २३,११७ शेतकऱ्यांची दुसरी यादी जाहीर

पुण्यश्लोक अहिल्यादेवी होळकर कर्जमुक्ती योजनेची दुसरी यादी जाहीर करण्यात आली आहे. सहकार मंत्र्यांनी पुण्यातील २३,११७ पात्र शेतकऱ्यांना आधार प्रमाणीकरण करून घेण्याचे आवाहन केले आहे.

पुण्यश्लोक अहिल्यादेवी होळकर किसान कर्जमुक्ती योजना-२०२६ अंतर्गत आधार प्रमाणीकरणासाठी पात्र शेतकऱ्यांची दुसरी यादी जाहीर करण्यात आली आहे. या यादीत पुणे जिल्ह्यातील २३,११७ शेतकऱ्यांचा समावेश आहे. सहकार मंत्री बाबासाहेब पाटील यांनी पात्र शेतकऱ्यांना यादीत आपली नावे आणि कर्ज खात्याचा तपशील तपासून लवकरात लवकर आधार प्रमाणीकरण प्रक्रिया पूर्ण करण्याचे आवाहन केले आहे.

दुसरी यादी जिल्हावार आणि बँकवार जाहीर करण्यात आली आहे. ही यादी संबंधित बँक शाखा, विकास संस्था आणि ग्रामपंचायतींना देखील उपलब्ध करून दिली जाईल. पुणे जिल्ह्यातील पात्र शेतकऱ्यांना त्यांच्या कर्ज खात्याची माहिती पडताळून घ्यावी लागेल आणि त्यानंतर आधार प्रमाणीकरणासाठी जवळच्या 'आपले सरकार सेवा केंद्रा'त जावे लागेल.

दुसऱ्या यादीत समाविष्ट असलेल्या शेतकऱ्यांना ३१ मार्च २०२६ रोजीच्या स्थितीनुसार त्यांच्या कर्ज खात्यातील शिल्लक रकमेची पडताळणी करणे देखील आवश्यक असेल. आधार प्रमाणीकरण पूर्ण झाल्यावर, कर्जमाफीची रक्कम पात्र शेतकऱ्यांच्या कर्ज खात्यांमध्ये जमा केली जाईल.

Edited By- Dhanashri Naik