सिंदेवाही वनपरिक्षेत्रात शनिवारी सकाळी दोन वेगवेगळ्या घटनांमध्ये तीन महिलांचा मृत्यू झाला तर एक महिला गंभीर जखमी झाली. या दुर्दैवी घटनेमुळे परिसरात शोककळा पसरली असून नागरिकांमध्ये भीतीचे वातावरण निर्माण झाले आहे.
चारगाव बागेस येथील रहिवासी वंदना विनायक गजभिये सकाळी 9.15 वाजता तेंदूपत्ता गोळा करण्यासाठी गेल्या. यावेळी दबा धरून बसलेल्या वाघाने अचानक हल्ला केला. वाघाच्या हल्ल्यामुळे वंदना ओरडली.
तिच्या ओरडण्याचा आवाज ऐकून जवळच असलेल्या इतर महिला आणि पुरुषांनी मदतीसाठी धाव घेतली. लोकांचे आवाज ऐकून वाघ जंगलाकडे पळाला, पण हल्ल्यात वंदना गंभीर जखमी झाली. घटनेची माहिती मिळताच वन विभागाचे अधिकारी तात्काळ घटनास्थळी पोहोचले आणि तपास केला. जखमी वंदना यांना उपचारासाठी सिंदेवाही येथील ग्रामीण रुग्णालयात दाखल करण्यात आले आहे.
तर तेंदूपत्ता काढण्यासाठी त्याच भागात गेलेल्या तीन महिला बऱ्याच वेळांनंतर घरी परतल्या नाही. त्यांच्या शोध घेतल्यावर तिघांचे मृतदेह आढळले.
नागरिकांनी तातडीने वन विभागाला याची माहिती दिली. वन विभागाचे अधिकारी घटनास्थळी पोहोचले, त्यांनी तपास सुरू केला आणि तिन्ही महिलांचे मृतदेह शवविच्छेदनासाठी सिंदेवाही ग्रामीण रुग्णालयात पाठवले. धक्कादायक म्हणजे मेंढा माळ येथे मृत्युमुखी पडलेल्या तीन महिलांमध्ये एकाच कुटुंबातील सासू आणि सुनेचा समावेश आहे.या घटनांमुळे सिंदेवाही वनपरिक्षेत्रात भीतीचे वातावरण निर्माण झाले आहे.
