परतीच्या पावसाचा धुमाकूळ, अनेक ठिकाणी जोरदार पाऊस

राज्यात परतीचा पावसाने जोरदार धुमाकूळ घातला आहे. कल्याण-डोंबिवलीसह अंबरनाथमध्ये विजेच्या कडकडाट आणि ढगांचा गडगडाटासह जोरदार पाऊस कोसळत आहे. विदर्भात देखील काही ठिकाणी पावसाने हजेरी लावली आहे. या पावसाचा फटका लोकल वाहतूकीला देखील बसला आहे. कल्याण ते कसारा वाहतूक विस्कळीत झाली आहे. 

पुणे शहरात झालेल्या पावसामुळे कात्रज, सहकारनगर, शिंदे हायस्कुल, अरणेश्वर, मित्रमंडळ चौक, सिंहगड रस्ता, एरंडवणा अशा विविध भागात २० ठिकाणी झाड पडल्याच्या घटना घडल्या आहेत. अग्निशमन दलाचे जवान काम करत आहेत.

यंदाच्या वर्षी मान्सूनचं आगमन काही काळ उशिराने झालं असलं तरी राज्यासह देशभरात समाधानकारक पाऊस झाला. काही ठिकाणी अतिवृष्टी आणि पूरपरिस्थितीही निर्माण झाली होती. त्यामुळे मोठं नुकसानही झालं. यंदाच्या पावसामुळे राज्यात पुरेसा पाणीसाठाही उपलब्ध आहे. आता या मान्सूनच्या परतीचा प्रवास सुरू झाला आहे.