NEET Paper Leak 'लातूर कोचिंग सेंटरच्या मालकाने ५ लाख रुपयांना रसायनशास्त्राचे प्रश्न विकत घेतले,' सीबीआयचा मोठा खुलासा

नीट पेपरफुटी प्रकरणात लातूर येथील कोचिंग सेंटरचे मालक शिवराज रघुनाथ मोटेगावकर यांनी पी. व्ही. कुलकर्णी यांच्याकडून रसायनशास्त्राचे प्रश्न मिळवण्यासाठी ५ लाख रुपये दिल्याचा आरोप आहे. पी. व्ही. कुलकर्णी हे परीक्षेचे प्रश्न तयार करणाऱ्या नॅशनल टेस्टिंग एजन्सी (एनटीए) च्या पॅनेलवर होते. सीबीआयने बुधवारी एका विशेष न्यायालयाला ही माहिती दिली.

एजन्सीने आरोप केला की, मोटेगावकर यांचा मुलगा कुलकर्णी यांच्या कोचिंग क्लासमध्ये शिकत होता, जिथे त्याला हे प्रश्न पुरवण्यात आले होते. मोटेगावकर यांच्या जामीन अर्जाला दिलेल्या उत्तरात, एजन्सीने आरोप केला आहे की, त्यांनी एका सह-आरोपीसोबत मिळून परीक्षेपूर्वी फुटलेले नीट (यूजी) केमिस्ट्रीचे प्रश्न मिळवण्यासाठी कट रचला आणि त्यासाठी ५ लाख रुपये दिले.

एजन्सीने सांगितले की, मोटेगावकर यांनी कुलकर्णी यांच्या केमिस्ट्री ट्युटोरिअल क्लासमध्ये दिलेल्या प्रश्नांवरून हाताने नोट्स तयार केल्या होत्या. सीबीआयने मोटेगावकर यांचा फोन जप्त केला, ज्यामध्ये ३६ फोटो (पाच डुप्लिकेट फोटो) होते, ज्यात १३२ हस्तलिखित केमिस्ट्रीचे प्रश्न होते.

तपासात काय आढळले?

आपल्या उत्तरात, सीबीआयने सांगितले की तपासात असे आढळले की, यापैकी १११ प्रश्न कथितरित्या NTA ने नीट (यूजी) २०२६ साठी तयार केलेल्या मास्टर प्रश्नसंचमधील प्रश्नांशी जुळत होते. त्यांनी दावा केला की हे फोटो कथितरित्या मोटेगावकर यांच्या हस्ताक्षरात होते.

त्यात असेही म्हटले आहे की, मेटाडेटा विश्लेषणातून असे दिसून आले आहे की, हे फोटो ३ मे रोजी झालेल्या नीट (यूजी) परीक्षेच्या सुमारे १० दिवस आधी काढण्यात आले होते. या प्रकरणी एजन्सीने १३ जणांना अटक केली असून, ते सर्व न्यायालयीन कोठडीत आहे.

Edited By- Dhanashri Naik