भिवंडी मध्ये चार मजली इमारत कोसळली, 9 जणांचा मृत्यू, बचावकार्य सुरु

महाराष्ट्रातील भिवंडीमधून सध्याची मोठी बातमी समोर येत आहे. पॉवरलूम शहर असलेल्या भिवंडीतील बालाजी नगर भागातील कोहिनूर इमारतीचा एक भाग गुरुवारी रात्री सुमारे साडेअकरा वाजता कोसळला. चार मजली जुन्या इमारतीचा मोठा भाग कोसळल्याने एक मोठी दुर्घटना घडली . काही कामगार आणि एक कुटुंब ढिगाऱ्याखाली अडकले.

प्राथमिक अहवालानुसार,9 जणांचा  मृत्यू झाला असून, सात ते आठ जण अडकल्याची भीती व्यक्त केली जात आहे. या घटनेमुळे परिसरात घबराट पसरली. अग्निशमन दल आणि एनडीआरएफची पथके घटनास्थळी दाखल झाली असून त्यांनी बचावकार्य सुरू केले आहे. एनडीआरएफच्या पथकाने एका महिलेला ढिगाऱ्याखालून सुखरूप बाहेर काढून रुग्णालयात दाखल केले आहे. उर्वरित लोकांचा शोध सुरू आहे.

मिळालेल्या माहितीनुसार, भिवंडीच्या नरपोली भागातील भंडारी कंपाऊंडमध्ये असलेली चार मजली कोहिनूर इमारत महानगरपालिकेने धोकादायक घोषित केली होती. तिला 'क' श्रेणीत ठेवण्यात आले होते. याचा अर्थ, इमारत धोकादायक घोषित करून ती रिकामी करण्याचे आदेश देण्यात आले होते. बहुतेक कुटुंबे इमारत सोडून गेली होती, फक्त एक कुटुंब तिथे काही दुरुस्तीचे काम करत होते. याच दरम्यान, इमारतीचा एक भाग कोसळला, ज्यामुळे तिथे उपस्थित असलेले कुटुंबीय आणि मजूर अडकले. युद्धपातळीवर मदत आणि बचाव कार्य सुरू आहे. ढिगाऱ्याखाली अडकलेल्या लोकांना सुरक्षितपणे बाहेर काढण्यासाठी बचावकार्य सुरू आहे.

पालिका अधिकाऱ्यांनी सांगितले की, इमारतीत ४८ खोल्या होत्या, प्रत्येक मजल्यावर १२. पालिकेने ही इमारत धोकादायक घोषित केली होती. अपघात घडला तेव्हा दुरुस्तीचे काम सुरू होते. मोठ्या आपत्तीच्या भीतीने, स्थानिक रहिवाशांनी तात्काळ अनेक कुटुंबांना सुरक्षित स्थळी हलवण्यासाठी मदत केली. मात्र, काही लोक बाहेर पडत असतानाच, इमारतीचा 'बी' विंग कोसळला.

प्रशासनाने घटनास्थळाभोवती सुरक्षा घेरा घातला असून, अफवांवर विश्वास न ठेवण्याचे आणि बचाव कार्यात अडथळा न आणण्याचे आवाहन लोकांना केले आहे. जखमी आणि मृतांच्या संख्येबाबत अधिकृत माहितीची प्रतीक्षा आहे. बीएनसीएमसीचे महापौर नारायण चौधरी म्हणाले, "आमची संपूर्ण टीम सध्या येथे कार्यरत आहे. इमारतीमधून वाचवण्यात आलेल्यांना गायत्री मंदिर-गीता हॉलमध्ये ठेवण्यात आले आहे. आम्हाला माहिती मिळाली आहे की, आत सुमारे सहा ते सात कर्मचारी होते. अग्निशमन दल, एनडीआरएफ आणि पोलीस सर्वजण यात सहभागी आहेत. संपूर्ण टीम कार्यरत आहे."

भिवंडी पश्चिमचे आमदार महेश चौगुले म्हणाले, "ही नारपोली येथील भंडारी कंपाऊंडमधील कोहिनूर इमारत आहे. तिच्या शेजारी आणखी एक इमारत होती. महानगरपालिकेने तिचे 'क' श्रेणीत वर्गीकरण केले होते, म्हणजेच ती धोकादायक मानली जात होती. इमारत रिकामी करण्यात आली असली तरी, काही लोक अजूनही तळमजल्यावर काम करत होते. तिथे काम करणाऱ्या मजुरांसह सुमारे सहा ते सात जण अडकले असावेत असे दिसते. एनडीआरएफचे पथक पोहोचले असून पोलीसही उपस्थित आहेत. महानगरपालिकेचे संपूर्ण पथक या कामात गुंतले आहे."

Edited By - Priya Dixit