महाराष्ट्र एसटी कामगार संघटना, अकोला विभागाने आयोजित केलेले उपोषण बुधवार, 27 ऑगस्ट रोजी सायंकाळी संपले. राज्य परिवहन मुंबईचे महाव्यवस्थापक, मुख्य कामगार अधिकारी आणि अमरावती प्रादेशिक व्यवस्थापक यांनी मध्यस्थी करून 20 सप्टेंबरपर्यंत सर्व प्रलंबित मागण्यांवर कारवाई करण्याचे ठोस आश्वासन दिल्यानंतर हा निर्णय घेण्यात आला. प्रशासनाने यापूर्वी दिलेले आश्वासन पूर्ण न झाल्याने संघटनेचे पदाधिकारी 25 ऑगस्टपासून उपोषणावर होते.
26 ऑगस्ट रोजी वरिष्ठ अधिकाऱ्यांच्या उपस्थितीत चर्चा झाली, ज्यामध्ये पदोन्नती प्रक्रियेतील त्रुटी दूर करून 20सप्टेंबरपर्यंत सर्व श्रेणींच्या पदोन्नती पूर्ण करण्याचे आश्वासन देण्यात आले. यासोबतच, अकोला विभागात अनुकंपा तत्वावर प्रलंबित नियुक्त्या लवकर निकाली काढण्याचा निर्णयही घेण्यात आला.
तसेच पदांची यादी अपडेट करण्यात आली असून पदांना नियुक्ती देण्याची प्रक्रिया तात्काळ सुरु करण्यात येईल.
याशिवाय 6,500 वेतनवाढीशी संबंधित वार्षिक वेतनवाढीचा प्रलंबित फरक यावरही चर्चा करण्यात आली. बैठकीत डेपोंमधील अधिकाऱ्यांचे वर्तन, कामाची यादी वेळेवर न टाकणे, फॉर्म-4 मधील त्रुटी, ईटीआयएम मशीनच्या समस्या इत्यादी मुद्द्यांवरही गांभीर्याने विचार करण्यात आला आणि संबंधित विभागांना कडक सूचना देण्यात आल्या. या सर्व मुद्द्यांवर लेखी आश्वासन मिळाल्यानंतर संघटनेने 20 सप्टेंबरपर्यंत उपोषण स्थगित करण्याचा निर्णय घेतला.
संघटनेचे विभागीय सचिव रूपम वाघमारे आणि अध्यक्ष गणेश डांगे यांनी स्पष्ट केले की, जर प्रशासनाने दिलेल्या आश्वासनाचे पालन केले नाही तर 22सप्टेंबरपासून पुन्हा उपोषण सुरू केले जाईल.
