जळगाव येथे भीषण रेल्वे अपघात झाला आहे. पाचोरा येथील परधाडे स्थानकाजवळ पुष्पक एक्स्प्रेसमध्ये आग लागल्याची अफवा पसरल्यानंतर घबराट पसरली. प्रवाशांनी साखळी ओढली आणि ट्रेनमधून उड्या मारायला सुरुवात केली. यानंतर दुसऱ्या ट्रॅकवर येणाऱ्या कर्नाटक एक्स्प्रेसने प्रवाशांना धडक दिली. या अपघातात 11 प्रवाशांचा मृत्यू झाला. तर अनेक प्रवासी जखमी झाले. घटनेची माहिती मिळताच रेल्वेचे अधिकारी घटनास्थळी पोहोचले. महाराष्ट्राचे मंत्री गिरीश महाजन म्हणाले की, जळगाव जिल्ह्याच्या जिल्हाधिकाऱ्यांच्या म्हणण्यानुसार या अपघातात 10 ते 12 प्रवाशांचा मृत्यू झाला आहे. दरम्यान, रेल्वेचे विभागीय आयुक्त प्रवीण गेडाम यांनी सांगितले की, या अपघातात 11 प्रवाशांचा मृत्यू झाला आहे. मृतांचा आकडा वाढू शकतो.
लखनौहून मुंबईला जाणाऱ्या पुष्पक एक्स्प्रेसच्या डब्यात आग लागल्याची अफवा पसरल्यानंतर पाचोरा येथील परधाडे स्थानकाजवळ चेन पुलिंग करण्यात आल्याचे मध्य रेल्वेच्या अधिकाऱ्यांनी सांगितले. ट्रेन थांबण्यापूर्वी प्रवासी घाबरून खाली उतरू लागले. मध्य रेल्वेचे मुख्य प्रवक्ते स्वप्नील नीला यांनी सांगितले की, पुष्पक एक्स्प्रेसमधील काही प्रवासी खाली उतरले आणि त्यांना समोरून येणाऱ्या बेंगळुरू एक्स्प्रेसने धडक दिली. विभागीय रेल्वे व्यवस्थापक भुसावळ घटनास्थळी रवाना झाले आहेत. रेल्वे वैद्यकीय पथक, रेल्वेचे वरिष्ठ विभाग अभियंता आणि स्थानिक प्रशासन घटनास्थळी पोहोचले असून त्यांनी मदत आणि बचाव कार्य सुरू केले आहे.
प्राथमिक माहितीनुसार, हॉट एक्सल किंवा ब्रेक-बाइंडिंगमुळे पुष्पक एक्स्प्रेसच्या डब्यात ठिणगी पडली आणि काही प्रवासी घाबरले. त्यांनी साखळी ओढली आणि काही जणांनी खाली उड्या मारल्या. त्याचवेळी बाजूच्या ट्रॅकवरून बेंगळुरू एक्स्प्रेस जात होती. बेंगळुरू एक्स्प्रेसने रुळावर उतरलेल्या प्रवाशांना तुडवले. महाराष्ट्राचे मंत्री गुलाबराव पाटील म्हणाले की, वरिष्ठ अधिकारी घटनास्थळी पोहोचले आहेत, त्यानंतर अधिक माहिती मिळेल.
आम्ही घटनास्थळी आहोत, असे नाशिकचे विभागीय आयुक्त प्रवीण गेडाम यांनी सांगितले. अतिरिक्त एसपी, एसपी, जिल्हाधिकारी आणि सर्व अधिकारी दाखल होत आहेत. आम्ही डीआरएम आणि रेल्वे अधिकाऱ्यांशी समन्वय साधत आहोत. शेवटच्या उपलब्ध माहितीनुसार, आठ रुग्णवाहिका घटनास्थळी पोहोचल्या आहेत, अतिरिक्त रेल्वे रेस्क्यू व्हॅन आणि रेल्वे रुग्णवाहिका घटनास्थळी पाठवण्यात येत आहेत.
