महाराष्ट्र सरकारने सर्पदंशाला अधिसूचित आजार म्हणून घोषित केले, अहवाल देणे अनिवार्य

महाराष्ट्र सरकारने सर्पदंशाला अधिसूचित आजार म्हणून घोषित केले आहे. यामुळे सार्वजनिक आणि खाजगी रुग्णालये, वैद्यकीय महाविद्यालये आणि आरोग्यसेवा व्यावसायिकांना प्रत्येक संशयित किंवा निश्चित प्रकरण आणि मृत्यूची नोंद करणे अनिवार्य झाले आहे. 

मिळालेल्या माहितीनुसार मंगळवारी, आरोग्य मंत्री प्रकाश आबितकर यांनी सांगितले की, या निर्णयामुळे सर्पदंशाच्या प्रकरणांवर देखरेख मजबूत होईल, वेळेवर उपचार सुनिश्चित होतील आणि सर्पविषरोधक (ASV) उपलब्धतेसाठी नियोजन सुधारेल. 

गडचिरोली जिल्ह्यातील जपटलाई गावातील एका निवासी शाळेत ९ ऑगस्ट रोजी विषारी सर्पदंशामुळे तीन आदिवासी शाळकरी मुलींचा मृत्यू झाल्यानंतर काही दिवसांनी हा निर्णय घेण्यात आला आहे. या अधिसूचनेनुसार, प्रत्येक आरोग्य संस्था आणि डॉक्टरांनी सर्पदंशाच्या प्रकरणांची माहिती जिल्हा आरोग्य अधिकारी किंवा जिल्हा शल्यचिकित्सकांना देणे बंधनकारक आहे. गंभीर किंवा प्राणघातक प्रकरणांची माहिती उपलब्ध संवाद प्रणालीद्वारे तात्काळ देणे आवश्यक आहे. प्रकरणांची नोंद आरोग्य व्यवस्थापन माहिती प्रणाली किंवा एकात्मिक रोग निगराणी कार्यक्रमाद्वारे केली जाईल. स्थानिक प्रतिबंधात्मक उपाययोजना तयार करण्यासाठी सरकार सर्पदंशाच्या घटना आणि मृत्यूशी संबंधित घटकांचा अभ्यास करेल.  

Edited By- Dhanashri Naik