राज्य विधिमंडळाचे हिवाळी अधिवेशन 7 डिसेंबरपासून होणार की, कोरोनाच्या संसर्गामुळे हिवाळी अधिवेशन आणि अर्थसंकल्पीय अधिवेशन एकत्र होणार हे अनिश्‍चित आहे. येत्या 2 डिसेंबर रोजी होणार्‍या कामकाज सल्लागार समितीच्या बैठकीत याबाबतचा निर्णय होणार असल्याचे विधानसभा अध्यक्ष नाना पटोले यांनी सांगितले. दिवाळीनंतर कोरोनाची लाट किती प्रमाणात येईल हे पाहून 2 तारखेला यासंदर्भात सरकार आणि विरोधी पक्षाचे प्रतिनिधी आपली मते मांडतील, त्यानंतरच अधिवेशनाची तारीख आणि कालावधी निश्‍चित होईल, असे पटोले म्हणाले.
कोरोनाची स्थिती पाहता हिवाळी अधिवेशन 7 डिसेंबरला नागपूरऐवजी मुंबईमध्ये होईल. या काळात जर कोरोनाची स्थिती नियंत्रणात राहिली, तर अधिवेशन ठरलेल्या दिवसापासून होईल, कमीत कमी दोन आठवडे अधिवेशन होणे स्थितीत अपेक्षित असल्याचे पटोले म्हणाले.
