जखमी कुस्तीपटू नीलेश कंदुरकर यांचे निधन

कुस्ती खेळताना मानेला गंभीर दुखापत झालेल्या जखमी कुस्तीपटू नीलेश कंदुरकर याचे उपचारदरम्यान निधन झाले. शुक्रवारी पहाटे उपचारादरम्यान त्याने अखेरचा श्वास घेतला. कराडच्या कृष्णा रुगणालयात उपचार सुरु होते. 

शाहूवाडी तालुक्यातील बांदवडे येथे कुस्ती खेळताना मल्ल नीलेश गंभीर जखमी झाला होता. त्यांनतर त्याला कोल्हापूर येथे उपचारासाठी दाखल करण्यात आले होते. मात्र, प्रकृती बिघडल्याने त्याला मुंबईला हलविण्यात येत होते. वाटेतच त्याला अत्यवस्थ वाटू लागल्याने कराडच्या कृष्णा हॉस्पिटलमध्ये दाखल करण्यात आले होते. ज्योतिबा यात्रेनिमित्ताने १ एप्रिलला कुस्ती स्पर्धा भरविण्यात आल्या होत्या. या मैदानात २० वर्षीय पैलवान नीलेश उतरला होता. कुस्ती खेळताना प्रतिस्पर्धी पैलवानाने नीलेशला आपल्या कवेत धरत उचलून जमिनीवर आपटले. या डावात नीलेश डोक्यावर आपटला गेला. त्यानंतर तो त्याच स्थितीत होता.