WTA: मायर शेरिफ डब्ल्यूटीए विजेतेपद जिंकणारी पहिली इजिप्शियन खेळाडू ठरली

मायर शेरीफ ही महिला टेनिस असोसिएशन (WTA) टूरचे विजेतेपद जिंकणारी पहिली इजिप्शियन खेळाडू ठरली. तिने परमा लेडीज ओपनच्या अंतिम फेरीत अव्वल मानांकित आणि जागतिक क्रमवारीत सातव्या क्रमांकावर असलेल्या ग्रीसच्या मारिया साकारीचा 7-5, 6-3 असा पराभव केला. सव्वीस वर्षीय शेरीफने विजेतेपद पटकावल्यानंतर कारकिर्दीत प्रथमच टॉप टेन खेळाडूचा पराभव केला. उत्तर आफ्रिकेत, ट्युनिशियाच्या ओन्स जेब्युअरनंतर महिला टेनिसची लोकप्रियता वाढवण्यात शेरीफची भूमिका महत्त्वाची आहे. ओन्सने यावर्षी विम्बल्डन आणि यूएस ओपनच्या अंतिम फेरीत प्रवेश केला. 

4व्या मानांकित शेरीफने एका दिवसात दोन सामने (उपांत्य आणि अंतिम) जिंकले. तिने प्रथम उपांत्य फेरीत सहाव्या मानांकित अॅना बोगडेनचा 6-4, 3-6, 6-4 असा पराभव केला. पावसामुळे उपांत्य फेरी दुसऱ्या दिवशी पुढे ढकलण्यात आली. साकारीने अन्य उपांत्य फेरीत डंका कोविनिकचा 7-5, 6-2 असा पराभव केला.

विजयानंतर शेरीफ म्हणाली, "माझ्या देशासाठी, माझ्या कुटुंबासाठी हे जेतेपद खूप महत्त्वाचं आहे. गेल्या आठवड्यात खूप मेहनत केली, मानसिक संघर्षातून गेले. मी खूप आनंदी आहे."

Edited By - Priya Dixit