अभिनेता अक्षय कुमारच्या बहिणीची फसवणूक करणाऱ्या मनसे नेत्याला अटक

बॉलिवूड क्षेत्रातून एक धक्कादायक माहिती समोर आली आहे, बॉलिवूड प्रसिद्ध अभिनेता अक्षय कुमार याची बहीण अलका भाटिया यांच्या कंपनीची फसवणूक केल्याप्रकरणी मुंबईच्या पवई पोलिसांनी महाराष्ट्र नवनिर्माण सेनेचे विभाग प्रमुख गणेश चुक्कल यांना अटक केली आहे. या कारवाईमुळे मनसेला मोठा धक्का बसला आहे.

मिळालेल्या माहितीनुसार अक्षय कुमार याची बहीण अलका भाटिया या संचालिका असलेल्या 'मेलरोनिया हॉस्पिटॅलिटी प्रायव्हेट लिमिटेड' या कंपनीच्या पवई येथील हिरानंदानी इस्टेटमधील 'ओडोनियो' इमारतीतील फ्लॅट क्र. ३५०५ संदर्भात हा वाद आहे. गणेश चुक्कल यांनी अलका भाटिया आणि कंपनीच्या इतर संचालकांची बनावट सही करून ३० वर्षांचा बोगस लीज करार तयार केल्याचा त्यांच्यावर आरोप आहे. पोलिसांनी दिलेल्या माहितीनुसार, २०१८ मध्ये चुक्कल यांच्या 'ब्राइस इन्फ्रास्ट्रक्चर' कंपनीने हा फ्लॅट ३६ महिन्यांसाठी भाड्याने घेतला होता. परंतु, भाडे देणे बंद झाल्यानंतर आणि करार संपुष्टात आल्यावर, त्यांनी मूळ कागदपत्रांमध्ये फेरफार करून ३ वर्षांची लीज थेट ३० वर्षे दाखवणारा बनावट दस्तऐवज तयार केला. कंपनीच्या तक्रारीवरून २०२२ मध्ये पवई पोलीस ठाण्यात फसवणूक, बनावट कागदपत्रे तयार करणे आणि खंडणी मागणे या कलमांखाली गुन्हा दाखल करण्यात आला होता. या प्रकरणाचा तपास करत पोलिसांनी अखेर गणेश चुक्कल आणि त्यांचा सहकारी समीर सावंत या दोघांना ताब्यात घेतले. आरोपींना न्यायालयात हजर केले असता, न्यायालयाने त्यांना ५ ऑक्टोबर २०२६ पर्यंत पोलीस कोठडी सुनावली आहे.