आयपीएल २०२७ साठी झहीर खान यांची मुख्य प्रशिक्षकपदी नियुक्ती केली

इंडियन प्रीमियर लीग (आयपीएल) २०२७ पुढील वर्षी होणार आहे. या स्पर्धेच्या पार्श्वभूमीवर, चेन्नई सुपर किंग्सने (सीएसके) एक मोठी घोषणा केली आहे. सीएसकेने भारताचा माजी वेगवान गोलंदाज झहीर खानची मुख्य प्रशिक्षक म्हणून नियुक्ती केली आहे. पुढील वर्षी चेन्नईला सहावे आयपीएल विजेतेपद मिळवून देण्याचे झहीर खानचे ध्येय असेल. झहीर खानला आयपीएलमध्ये प्रशिक्षणाचा मोठा अनुभव असून, तो  अलीकडेच कॅनडातील व्हँकुव्हर अँकर्स संघात सामील झाला आहे.

२०१७ मध्ये आयपीएलमधून खेळाडू म्हणून निवृत्त झाल्यापासून, झहीर खानने विविध भूमिका बजावल्या आहेत. आपल्या आयपीएल कारकिर्दीत तो रॉयल चॅलेंजर्स बंगलोर, मुंबई इंडियन्स आणि दिल्ली कॅपिटल्स या संघांचा भाग होता. २०१९ च्या आयपीएलपूर्वी, मुंबई इंडियन्सने त्याची क्रिकेट ऑपरेशन्स संचालक म्हणून नियुक्ती केली होती. नंतर त्याने संघाच्या जागतिक विकास प्रमुखाची भूमिका स्वीकारली. झहीर अलीकडेच लखनौ सुपर जायंट्सशी देखील संबंधित होता. आयपीएल २०२५ साठी त्याची संघाचा मार्गदर्शक म्हणून नियुक्ती करण्यात आली होती, परंतु त्याने पुढील हंगामापूर्वी फ्रँचायझी सोडण्याचा निर्णय घेतला.

झहीर सीएसकेमध्ये स्टीफन फ्लेमिंग यांची जागा घेणार आहे, ज्यांनी २००९ ते २०२६ पर्यंत जवळपास १८ वर्षे चेन्नई सुपर किंग्सला प्रशिक्षण दिले. गेल्या काही वर्षांमध्ये चेन्नई सुपर किंग्सच्या यशात फ्लेमिंग यांनी महत्त्वाची भूमिका बजावली. फ्रँचायझीसोबतचा त्यांचा दीर्घकाळचा संबंध आता संपुष्टात आला आहे. त्यांनी इंग्लंड क्रिकेट संघासोबत नवीन जबाबदाऱ्या स्वीकारल्या असून, जुलैमध्ये त्यांची इंग्लंड पुरुष कसोटी संघाच्या मुख्य प्रशिक्षकपदी नियुक्ती करण्यात आली आहे.

झहीर खानसाठी, सीएसकेचा प्रशिक्षक बनणे हा त्याच्या प्रशिक्षण कारकिर्दीतील एक महत्त्वाचा टप्पा आहे. खेळाडू म्हणून, झहीर खानने आयपीएलमध्ये १०० सामने खेळले असून २७.२७ च्या सरासरीने १०२ बळी घेतले आहेत. भारतासाठी त्याची आंतरराष्ट्रीय कारकीर्दही शानदार होती, ज्यात त्याने तिन्ही फॉरमॅटमध्ये मिळून एकूण ६१० बळी घेतले.

सीएसकेमध्ये सामील झाल्यानंतर, झहीर म्हणाला की या फ्रँचायझीचा भाग होणे हा त्याचा सन्मान आहे. त्याने पुढे सांगितले की एक खेळाडू म्हणून चेन्नईविरुद्धच्या सामन्यांचा त्याने पुरेपूर आनंद घेतला. झहीरने चेपॉकमधील सुपर फॅन्सनी निर्माण केलेल्या वातावरणाची प्रशंसा केली आणि या गौरवशाली फ्रँचायझीच्या वारशाचा भाग होण्यासाठी तो उत्सुक असल्याचे सांगितले.

Edited By - Priya Dixit