Mango Malpua Recipe मालपुआला द्या आंब्याचा ट्विस्ट; एक अप्रतिम चव

आंब्याचा हंगाम असो किंवा काहीतरी गोड खाण्याची इच्छा, मालपुआला आंब्याचा हा ट्विस्ट देऊन तुम्ही नेहमीच्या गोड पदार्थाला एक अप्रतिम चव देऊ शकता. मऊ, रसाळ आणि सुगंधी मँगो मालपुआ लहानांपासून मोठ्यांपर्यंत सर्वांनाच नक्की आवडेल.

साहित्य-
मालपुआच्या मिश्रणासाठी:
आंब्याचा पल्प : १ कप (हापूस किंवा केशर आंबा उत्तम)
मैदा: १ कप
रवा (बारीक): २ ते ३ मोठे चमचे (यामुळे मालपुआ छान कुरकुरीत होतो)
दूध किंवा साय: अर्धा कप (आवश्यकतेनुसार)
बडीशेप पावडर: १ छोटा चमचा (छान स्वादासाठी)
वेलची पावडर: अर्धा छोटा चमचा
तूप किंवा तेल: मालपुआ तळण्यासाठी

साखरेच्या पाकासाठी-
साखर: १ कप
पाणी: १ कप
केशर: ४-५ कड्या (ऐच्छिक)
वेलची पावडर: अर्धा छोटा चमचा

कृती-
१. पाकाची तयारी: एक कढई किंवा पातेल्यात साखर आणि पाणी एकत्र करून गरम करायला ठेवा. साखर पूर्णपणे विरघळल्यावर त्यात केशर आणि वेलची पावडर टाका. आपल्याला एकतारी पाक करायचा नाहीये, फक्त बोटाला चिकटेल असा गुलाबजामसारखा चिकट पाक हवा आहे. पाक तयार झाल्यावर गॅस बंद करा.

२. मालपुआचे मिश्रण बनवणे:एका मोठ्या भांड्यात मैदा, रवा, बडीशेप पावडर आणि वेलची पावडर एकत्र करा. आता त्यात आंब्याचा पल्प घालून मिक्स करा. त्यानंतर थोडे थोडे दूध घालत याचे मध्यम स्वरूपाचे मिश्रण तयार करा (मिश्रण जास्त घट्ट किंवा जास्त पातळ नसावे, जसे आपण डोश्याचे पीठ करतो तसेच) हे मिश्रण १५ ते २० मिनिटे झाकून बाजूला ठेवा, जेणेकरून रवा छान फुगेल.

३. मालपुआ तळणे: एका सपाट तळ असलेल्या कढईत किंवा पॅनमध्ये तूप/तेल गरम करा. (तुपात तळल्यास मालपुआ जास्त चविष्ट लागतो). तेल मध्यम गरम झाल्यावर, एका मोठ्या चमच्याने (पळीने) मिश्रण कढईच्या मध्यभागी सावकाश सोडा. त्याला पसरवण्याची गरज नाही, ते स्वतःच गोल आकार घेईल. मंद ते मध्यम आचेवर मालपुआ दोन्ही बाजूंनी छान सोनेरी आणि कडेने कुरकुरीत होईपर्यंत तळून घ्या.

४. पाकात भिजवणे: तळलेला गरम मालपुआ थेट कोमट साखरेच्या पाकात टाका. मालपुआ पाकात २ ते ३ मिनिटे राहू द्या, जेणेकरून तो पाक नीट शोषून घेईल. त्यानंतर मालपुआ पाकातून बाहेर काढा. तुमचा रसाळ मँगो मालपुआ तयार आहे! सर्व्ह करताना वरून पिस्ता आणि बदामाचे काप घालून सजवा. 
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीचीपूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.

Edited By- Dhanashri Naik