बाजारात मिळते अगदी तशी आंबट, गोड, तिखट आणि क्रीमी 'दही पुरी' घरच्या घरी बनवा

दही पुरी हा चाट प्रकार लहानांपासून मोठ्यांपर्यंत सगळ्यांचाच अत्यंत आवडता आहे. बाहेर गाड्यावर मिळतो तसाच आंबट, गोड, तिखट आणि क्रीमी रेस्टोरंट स्टाईल 'दही पुरी' घरच्या घरी कशी बनवायची, याची सोपी रेसिपी आज आपण पाहूया.

साहित्य-
पुऱ्या: १०-१२ (पाणीपुरीसाठी वापरतात त्या)
उकडलेले बटाटे: २ (मॅश केलेले)
दही: १ मोठा कप (घट्ट आणि ताजे)
पिठीसाखर: १ ते २ चमचे (दही गोड करण्यासाठी)
पुदिना-कोथिंबीरची तिखट चटणी: ४-५ चमचे
चिंच-गुळाची गोड चटणी: ४-५ चमचे
बारीक शेव: १/२ कप
चाट मसाला: १ छोटा चमचा
भाजलेली जिरे पूड: १ छोटा चमचा
लाल तिखट: १/२ छोटा चमचा
काळं मीठ किंवा साधे मीठ: चवीनुसार
कोथिंबीर: बारीक चिरलेली (सजावटीसाठी)
डाळिंबाचे दाणे: २ चमचे (ऐच्छिक)

कृती-
१. दही तयार करणे: एका भांड्यात घट्ट दही घ्या. त्यात पिठीसाखर आणि थोडेसे साधे मीठ घालून चमच्याने किंवा विस्करने चांगले फेटून घ्या, जेणेकरून दही एकदम स्मूथ आणि थोडे गोड होईल. दही थंड असावे.

२. बटाट्याचे सारण: उकडलेल्या बटाट्यामध्ये थोडे मीठ, जिरे पूड आणि बारीक चिरलेली कोथिंबीर घालून मिक्स करून ठेवा. (तुम्हाला आवडत असल्यास यात उकडलेले काळे चणे किंवा मूगही घालू शकता).

३. अशी बनवा दही पुरी :एका सर्व्हिंग प्लेटमध्ये पुऱ्या मधोमध फोडून (पाणीपुरीसारख्या) गोलाकार रचून घ्या. प्रत्येक पुरीमध्ये थोडे उकडलेल्या बटाट्याचे सारण भरा. आता प्रत्येक पुरीमध्ये आधी थोडी तिखट चटणी आणि मग गोड चिंचेची चटणी टाका. यानंतर, चमच्याने भरपूर फेटलेले गोड दही पुऱ्यांवर आणि प्लेटमध्ये आजूबाजूला पसरेल असे टाका. (पुऱ्या दह्याने पूर्ण झाकल्या गेल्या पाहिजेत). वरून लाल तिखट, चाट मसाला, जिरे पूड आणि काळं मीठ भुरभुरा. शेवटी वरून भरपूर बारीक शेव, कोथिंबीर आणि डाळिंबाचे दाणे घालून सजवा.

खास टिप्स:
दही पुरी बनवल्याबरोबर लगेच सर्व्ह करा, नाहीतर पुऱ्या मऊ पडतात आणि कुरकुरीतपणा चालला जातो.
दही जास्त आंबट नसावे, ताजे आणि थंड दही वापरल्यास चव अप्रतिम लागते. तुमची जिभेची चव वाढवणारी, थंडगार आणि चटपटीत दही पुरी तयार आहे!
अस्वीकरण (Disclaimer) : या लेखात दिलेली माहिती आणि उपाय सामान्य माहितीवर आधारित आहे.या माहितीचीपूर्णता, विश्वासार्हता आणि अचूकता याबाबत वेबदुनिया कोणतीही हमी देत ​​नाही. अधिक माहितीसाठी संबंधित तज्ज्ञांचा सल्ला घ्यावा.

Edited By- Dhanashri Naik