अमृता फडणवीसांचा प्रकल्प, ASI ची नोटीस; चंद्रपूरमध्ये ऐतिहासिक शिवलिंगाचा जीर्णोद्धार वादात सापडला

महाराष्ट्रातील चंद्रपूर येथील एका ऐतिहासिक शिवलिंगाचा जीर्णोद्धार वादात सापडला आहे. महाराष्ट्राचे मुख्यमंत्री देवेंद्र फडणवीस यांच्या पत्नी अमृता फडणवीस यांनी हा प्रकल्प सुरू केला होता. भारतीय पुरातत्व सर्वेक्षण विभागाने (ASI) मंदिराचा जीर्णोद्धार बेकायदेशीर असल्याचे सांगत नोटीस बजावली आहे. चंद्रपूरच्या लालपेठ येथे भगवान शिवाला समर्पित असलेले हे प्राचीन मंदिर आहे.

मिळालेल्या माहितीनुसार चंद्रपूर मधील ऐतिहासिक संरक्षित शिवलिंगाच्या जीर्णोद्धाराचा सोहळा वादात सापडला आहे. हा कार्यक्रम अमृता फडणवीस यांच्या उपस्थितीत पार पडला. मात्र, चंद्रपूरमधील सोहळ्याच्या अगदी आधी, भारतीय पुरातत्व सर्वेक्षण विभागाच्या एका नोटीसमुळे हे प्रकरण वादात सापडले आहे. भारतीय पुरातत्व सर्वेक्षणने राष्ट्रीय महत्त्वाच्या संरक्षित स्मारकाच्या प्रतिबंधित क्षेत्रात मंदिराचे बांधकाम होत असल्याच्या कारणावरून, लालपेठ विशाल शिवलिंग मंदिर सेवा समितीच्या अध्यक्षांना बांधकाम तात्काळ थांबवण्याचे आणि कथित अतिक्रमण हटवण्याचे निर्देश दिले आहे. यामुळे जीर्णोद्धार सोहळ्यासाठी करण्यात आलेल्या बांधकामाच्या कायदेशीरपणावर प्रश्नचिन्ह निर्माण झाले आहे.

लालपेठ येथे असलेले शिवलिंग हे भारतीय पुरातत्व सर्वेक्षण विभागांतर्गत राष्ट्रीय महत्त्वाचे संरक्षित स्मारक आहे. पुरातत्व स्थळे आणि अवशेष अधिनियम, १९५८ नुसार, संरक्षित स्मारकाच्या सीमेपासून १०० मीटरपर्यंतचा परिसर प्रतिबंधित क्षेत्र मानला जातो. या क्षेत्रात कोणत्याही नवीन बांधकामास परवानगी नाही. स्मारकाच्या सीमेपासून १०० ते ३०० मीटरचा परिसर नियंत्रित क्षेत्र आहे. येथे कोणत्याही प्रकारच्या बांधकामासाठी सक्षम प्राधिकरणाची पूर्वपरवानगी घेणे अनिवार्य आहे. परिणामी, शिवलिंगाच्या जीर्णोद्धाराच्या नावाखाली सुरू असलेल्या बांधकामावर पुरातत्व विभागाने गंभीर आक्षेप नोंदवले आहे. पुरातत्व विभागाच्या तपासणीत शिवलिंगाभोवती ग्रॅनाइटची उभारणी, सिमेंटच्या विटांची भिंत आणि आवारात एक काँक्रीटचे शेड आढळून आले. संरक्षित स्मारकाच्या प्रतिबंधित क्षेत्रात हे काम करण्यात आल्याचा आरोप आहे.

मंगळवारी होणाऱ्या जीर्णोद्धाराच्या उद्घाटन सोहळ्याची तयारी सुरू असतानाच, अमृता फडणवीस यांच्या उपस्थितीसाठी प्रशासकीय तयारी सुरू होती. शहरभर बॅनर्स लावण्यात आले होते. दरम्यान, पुरातत्व विभागाची नोटीस जारी झाल्याने हे प्रकरण गंभीर बनले आहे.

Edited By- Dhanashri Naik