बाप्परे, सरकारला बदनाम करण्यासाठी विविध सोशल मीडिया साईटवर ८० हजार फेक अकाऊंट उघडली

अभिनेता सुशांत सिंह राजपूतच्या आत्महत्येनंतर मुंबई पोलिस आणि महाविकास आघाडी सरकारला बदनाम करण्यासाठी विविध सोशल मीडिया साईटवर ८० हजार फेक अकाऊंट उघडण्यात आल्याची धक्कादायक माहिती मुंबई पोलीस आयुक्त परमबीर सिंह यांनी दिली आहे. याबाबत मुंबई सायबर सेल पुढील तपास करत असून Information Technology Act नुसार गुन्हा दाखल करण्यात आला आहे. 

आयुक्त परमबीर सिंह यांनी चौकशीचे आदेश दिल्यानंतर मुंबई सायबर सेल कामाला लागला असून त्यांनी काही हजारो फेक अकाऊंट्सची माहिती गोळा केली आहे. ही अकाऊंट्स इटली, जपान, पोलंड, इंडोनेशिया, तुर्की, थायलंड, रोमानिया आणि फ्रान्स चालवली जात होती. या देशांमधून या अकाऊंटवर पोस्ट पडत होत्या. सिंह म्हणाले की, बहुतेक अकाऊंट्सवरुन परकीय भाषेत पोस्ट अपलोड झालेल्या आहेत. त्यांनी #justiceforsushant #sushantsinghrajput and #SSR वापरले होते. आम्ही आणखी काही अकाऊंट्सचा तपास करत आहोत. 

“मुंबई पोलिसांना बदनाम करण्यासाठी आणि आमच्या तपासाची दिशा भरकटवण्यासाठी ही ट्रोलिंग करण्यात आली होती. कोरोना महामारीमुळे त्यावेळी ८४ पोलीस शहीद झाले होते. ६ हजार पोलिसांना कोरोनाची लागण झाली होती. तरिही पोलिसांचे खच्चीकरण केले गेले. मुंबई पोलीस कमकुवत असल्याची एक प्रतिमा तयार करण्याचा प्रयत्न झाला. आम्ही या प्रकरणात गांभीर्याने तपास सुरु केला असून जे दोषी आढळतील त्यांच्यावर Information Technology Act कायद्यानुसार कारवाई करण्यात येईल.”, अशी माहिती मुंबई पोलीस आयुक्त परमबीर सिंह यांनी दिली.