भारताच्या सात्विकसाईराज रँकीरेड्डी आणि चिराग शेट्टी या जोडीने स्विस ओपनमध्ये पुरुष दुहेरीचे विजेतेपद पटकावले आहे. अंतिम फेरीत भारतीय जोडीने तांग कियान आणि रेन यू शियांग या चिनी जोडीचा पराभव केला. सात्विक आणि चिराग यांनी जेनी जोडीचा 21-19 आणि 24-22 अशा सरळ सेटमध्ये पराभव केला. स्विस ओपन सुपर सीरिज 300 बॅडमिंटन स्पर्धेतील पुरुष दुहेरीच्या विजेतेपदाच्या लढतीत भारतीय जोडी सुरुवातीपासूनच उत्कृष्ट संपर्कात होती. सात्विक-चिराग यांनी पहिला गेम 21-19 अशा फरकाने जिंकला, परंतु दुसऱ्या गेममध्ये दोन जोड्यांमधली चुरशीची लढत पाहायला मिळाली. तथापि, भारतीय जोडीने अखेरीस 24-22 अशा फरकाने गेम जिंकून विजेतेपदही पटकावले.
तत्पूर्वी, भारतीय जोडीने 54 मिनिटे रंगलेल्या लढतीत जेप्पे बे आणि लासे मोल्हेडे या डॅनिश जोडीचा 15-21, 21-11, 21-14 असा पराभव केला होता. त्याचवेळी उपांत्यपूर्व फेरीतही सात्विक-चिराग यांनी 84 मिनिटे चुरशीचा सामना खेळला.भारतीय जोडीचे हे मोसमातील पहिले विजेतेपद ठरले. सात्विक आणि चिरागने 2022 च्या राष्ट्रकुल स्पर्धेतही सुवर्णपदक जिंकले होते. 2019 मधील थायलंड ओपन आणि 2018 मधील हैदराबाद ओपन याशिवाय गतवर्षी इंडिया ओपन आणि फ्रेंच ओपन जिंकणाऱ्या भारतीय जोडीचे हे करिअरमधील पाचवे वर्ल्ड टूर विजेतेपद होते.
